शेरबहादुर राई
ओखलढुङ्गा, असोज ४ गते । ओखलढुङ्गा कारागारमा कैदीबन्दीबिच झडप भएको छ । बिहीबार बिहान ३ बजेको समयमा कैदीबन्दीबिच झडप भएको हो ।
कारगारको नाइके र सहनाइकेले आर्थिक शोषणका साथै अपचलन गरेको आरोपमा झगडा भएको बताइएको छ । कैदीबन्दीको आक्रोशित भीड नाइके र सहनाइकेमाथि खनिएकाे थियाे ।
कारागारमा तनाव सिर्जना भएपछि नाइके र सहनाइकेलाई नुवाकोट स्थानान्तरण गरिएको कारागार प्रशासक जेलर लेखनाथ दाहालले बताउनुभयो । "अवस्था तनावपूर्ण बनेपछि तत्कालको लागि कारागारमा रहेका नाइके र सहनाइकेलाई नुवाकोट कारागारमा स्थान्तरण गरिएको छ," जेलर दाहालले भन्नुभयाे ।
आन्तरिक कलहका कारण उनीहरुबिच झगडा भएको दाहालकाे भनाइ छ । कारागारमा यस्ता घटना बेलाबेलामा भइरहने भएपनि कैदी र नाइके तथा सहनाइकेबिच धेरै असमझदारी बढेपछि झगडाको अवस्था सिर्जना हुने गरेकाे दाहालले बताउनुभयाे । आगामी दिनमा यस प्रकारका घटना हुन नदिनका लागि कारागार प्रशासन थप गम्भीर रहनेसमेत उहाँकाे भनाइ छ ।
यस्तै, कारागारमा क्षमता भन्दा तीन गुणा बढी कैदीबन्दीहरु रहेकै कारण यस्ता समस्या हुने उहाँले उल्लेख गर्नुभयो ।
