प्रेमराज सिम्खडा
कालीकोट, भदौ २४ गते । बर्खाभरि कर्णाली राजमार्गको यात्रा निकै कष्टकर हुने गरेको छ । यात्रा कष्टकर हुँदा सर्वसाधारण यात्रुले निकै दुःख पाउने गरेका छन् । यसका साथै पटक पटक अवरुद्ध हुने राजमार्गको यात्रा असुरक्षितसमेत हुने गरेको छ । नाम राजमार्गको भए पनि अवस्था भने कच्ची सडकको जस्तै भएको गुनासो स्थानीयले गर्न थालेका छन् ।
पहिरोका कारण सडक अवरुद्ध हुँदा पैदल हिँड्ने बाटोसमेत नहुँदा पहिरोमा परेर मानिसको ज्यान जोखिममा पर्ने गरेको छ । रास्कोट नगरपालिका–७ का जैदन रोकायाले आफू सुर्खेतबाट घर फर्कंदा सडकमा पहिरो आएका कारणले पैदल हिँड्ने बाटो नपाउँदा तीन दिनसम्म थुनिएको बताउनुभयो । उहाँले भिरको बाटोबाट जानुपर्ने अवस्था आएको भन्दै तीन दिनपछि बल्लतल्ल खुट्टा टेक्ने ठाउँ पाएर घर गएको जनाउनुभयो । त्रासैत्रासबिच घर पुगेको उहाँको पीडा छ ।
यस्तै समस्या बर्दियाका किरण पौडेलले पनि भोग्नु परेको छ । एक गैरसरकारी संस्था जुम्लामा कार्यरत पौडेल सुर्खेतबाट फर्कने क्रममा निकै सास्ती भोग्नु परेको पीडा पोख्नुभयो । दैलेखको आठबिसको मालाचौरदेखि कालीकोटको शुभकालिका गाउँपालिका–१, एसमोडसम्म सडक ठाउँ ठाउँमा भासिएकाले पैदल हिँड्न पनि नसक्दा निकै दुःख पाएको उहाँले सुनाउनुभयो ।
पौडेलले कतिपय ठाउँमा सडकको अनुमानसमेत नभएकाले पैदलयात्रीले पनि निकै जोखिम मोल्नु परेको बताउनुभयो । अनुमानका भरमा एकअर्कालाई समातेर पैदल हिँड्नु परेको उहाँको भनाइ छ । दुःखको समयमा देखाउनुपर्ने मानवीय भावनासमेत यस्तो बेला कसैले नदेखाएको दुःखेसो उहाँले पाउनुभयो ।
कर्णाली राजमार्गमा यात्रुले सास्ती पाउने गरेका छन् । पहिरोले गर्दा बन्दमा पर्नु एकातिरको समस्या हो भने अर्कातिर हिलाम्मे भएका सडकमा गाडी चढ्न नसक्दा घण्टौँ एकै ठाउँमा कुर्नुपर्ने समस्या छ । कर्णाली राजमार्गमा लामो समयदेखि ट्रक चलाउँदै आएका बाँकेका धनबहादुर विकले दुःख सम्झँदा पीडाबोध हुने बताउनुभयो ।
कर्णाली राजमार्गको समयमा गतिलो स्तरवृद्धि नहुँदा यहाँका बासिन्दा मात्र नभई यो राजमार्ग प्रयोग गर्ने जो कोहीले पीडा भोग्नु परेको छ । कालीकोट जुबिथाका कृष्णबहादुर शाहीले कालीकोट जिल्लाकै मुख्यमन्त्री हुँदा त सुधार नभएको राजमार्ग अब के होला ? भनेर प्रश्न गर्नुभयो । यहाँको माटोसँग हुर्केकाहरूले त यहाँको दुख सम्झेर सुधारका प्रयास गर्दैनन् भने अरू सहरमा बसोबास गर्ने नेता, मन्त्रीहरूले हाम्रा दुःखलाई गहिरो गरी सम्झन नसक्ने उहाँले बताउनुभयो ।
