बाँकेमा तीन लाख ९८ हजार क्यु फिटबढी काठ उत्पादन

खजुरा, साउन २१ गते । बाँके जिल्लामा गत आर्थिक वर्ष २०८०–०८१ मा झन्डै चार लाख क्यु फिट काठ उत्पादन भएको छ । गत आवमा जिल्लामा विभिन्न जातका तीन लाख ९८ हजार ६०८ दशमलव ७८ क्यु फिट काठ उत्पादन भएको हो ।

जिल्लाका विभिन्न सामुदायिक वन, राष्ट्रिय वन तथा निजी आवादी वनमा गरी गत आर्थिक वर्षमा तीन लाख ९८ हजार ६०८ दशमलव ७८ क्यु फिट काठ उत्पादन भएको डिभिजन वन कार्यालय बाँकेका सूचना अधिकारी वरिष्ठ वन अधिकृत वीरेन्द्र रोकाले बताउनुभयो ।

सूचना अधिकारी रोकाका अनुसार ८९ सामुदायिक वन, एउटा राष्ट्रिय वन (चक्ला वन) र निजी आवादी वनमा गरी उक्त मात्रामा काठ उत्पादन भएको हो । २४ वटा संवर्धन प्रणाली लागू भएका सामुदायिक वनबाट एक लाख ९४ हजार ११० दशमलव ११ क्यु फिट, ६५ वटा  संवर्धन प्रणाली लागू नभएका सामुदायिक वनबाट ६३ हजार ७४ दशमलव ९९ क्यु फिट र एउटा  संवर्धन प्रणाली लागू भएको राष्ट्रिय वन (शमसेरगन्ज माथेवास चक्ला वन)बाट ७१ हजार १११ दशमलव ०१ क्यु फिट काठ उत्पादन भएको उहाँले जानकारी दिनुभयो ।

त्यसै गरी विभिन्न व्यक्तिका निजी तथा आवादी वन क्षेत्रबाट गत आर्थिक वर्षमा ७० हजार ३१२ दशमलव ६७ क्यु फिट गरी जम्मा तीन लाख ९८ हजार ६०८ दशमलव ७८ क्यु फिट काठ उत्पादन गरिएको सूचना अधिकारी रोकाले बताउनुभयो ।

त्यसै गरी विभिन्न सामुदायिक वनबाट विभिन्न जातका ९९७ दशमलव १४ चट्टा, राष्ट्रिय वनबाट २७७ दशमलव २५ चट्टा र निजी आवादी वनबाट ९०३ दशमलव ०९ चट्टा गरी जम्मा दुई हजार १७७ दशमलव ४८ चट्टा दाउरा उत्पादन भएको छ ।

सामुदायिक तथा राष्ट्रिय वनबाट साल, असना, धौटी, जामुन, खयर, सिसौ, हर्रो, बर्रो, कर्मालगायतका प्रजातिका काठ तथा दाउरा उत्पादन भएको र निजी आवादी वनबाट मसला, टिक (सागवन), सिसौ, सिमल, खयरलगायतका प्रजातिका काठ तथा दाउरा उत्पादन भएको वन अधिकृत रोकाले जानकारी दिनुभयो ।

आर्थिक वर्ष २०७९÷०८० मा भन्दा गत आर्थिक वर्षमा काठ तथा दाउरा उत्पादनको अनुपात बढेको छ । आर्थिक वर्ष २०७९÷०८० मा बाँकेमा विभिन्न जातका तीन लाख ५२ हजार दशमलव ८१ क्यु फिट काठ उत्पादन भएको थियो भने एक हजार ७५७ दशमलव ३६ चट्टा दाउरा उत्पादन गरिएको थियो । 

बाँकेमा एक लाख १९ हजार ९३९ दशमलव ७४ हेक्टर वन क्षेत्र रहेको छ । जसमध्ये, ६२ हजार २०० दशमलव ६८ हेक्टर वन (५१ दशमलव ८६ प्रतिशत) बाँके राष्ट्रिय निकुञ्ज अन्तर्गत र ५७ हजार ७३९ दशमलव ०६ हेक्टर वन (४८ दशमलव १४ प्रतिशत) डिभिजन वन कार्यालयको क्षेत्राधिकार भित्र रहेको सहायक वन अधिकृत नवराज शाहीले जानकारी दिनुभयो । ५७ हजार ७३९ दशमलव ०६ हेक्टर वन क्षेत्रमध्ये ५२ हजार ९३३ दशमलव ०९ हेक्टर वन रुखले ढाकेको र चार हजार ८०५ दशमलव ९७ हेक्टर वन क्षेत्र झाडी तथा बुट्यानले ढाकेको छ ।

सहायक वन अधिकृत शाहीका अनुसार जिल्लामा एक सय १९ वटा सामुदायिक वन, एउटा चक्ला वन, चार वटा धार्मिक वन र राष्ट्रिय वन छन् । सामुदायिक वन ३४ हजार ७ हेक्टर, चक्ला वन दुई हजार ५७८ हेक्टर, धार्मिक वन करिब एक सय हेक्टरमा रहेका छन् भने अन्य वन क्षेत्र राष्ट्रिय वनले ओगटेको शाहीले जानकारी दिनुभयो ।