काँक्रेबिहार (सुर्खेत), वैशाख १७ गते । कर्णाली प्रदेशका मुख्यमन्त्री यामलाल कँडेलले चालू आर्थिक वर्षका सबै योजना जेठ मसान्तभित्र सम्पन्न गर्ने गरी सरकार अगाडि बढिरहेको बताउनुभएको छ ।
प्रदेशसभाको बैठकमा उहाँले विगतमा जस्तो अब असारमा योजना कार्यान्वयन गर्ने पक्षमा आफू नरहेको बताउनुभयो । “जेठ मसान्तभित्र सबै कामहरू गरिसक्ने गरी सरकार अगाडि बढिरहेको छ । मेरो नेतृत्वको सरकार असार महिनामा कुनै पनि ठेक्का लगाउने र योजना कार्यान्वयन गर्ने पक्षमा छैन”, मुख्यमन्त्री कँडेलले सभामा भन्नुभयो । उहाँले चालु आवका विभिन्न योजना शीर्षकमा बाँकी रहेको रकम प्राथमिकताका आधारमा क्रमागत र बहुवर्षे योजनामा खर्च गर्न आफू तयार रहेकोसमेत बताउनुभयो ।
मुख्यमन्त्री कँडेलले सबैले अनुभूत गर्ने गरी सरकारले काम गर्ने र सङ्घीय सरकारलाई बजेट विनियोजनका लागि पठाएका योजनामासमेत आफूले त्यही मान्यतालाई अनुसरण गरेको बताउनुभयो । त्यस्तै, अघिल्लो सरकारले गरेका राम्रा कामहरूलाई प्राथमिकतामा राखेर अगाडि बढ्न तयार रहेको उहाँले बताउनुभयो । प्रदेशसभाका हिउँदे अधिवेशन आजैदेखि अन्त्यका लागि सिफारिस गरेको पनि उहाँले सदनलाई जानकारी गराउनुभयो । रासस
