• ८ जेठ २०८१, मङ्गलबार

प्रजनन केन्द्रले कतारलाई हात्ती उपहार दिने

blog

हात्ती प्रजनन केन्द्र खोरसोर सौराहामा हात्तीका छावालाई तालिम दिइँदै ।

वसन्त पराजुली

नारायणगढ, वैशाख ११ गते । सैँतिस वर्षअघि भारत, म्यानमार र थाइल्याण्डबाट हात्ती उपहार लिएर स्थापना गरिएको हात्ती प्रजनन केन्द्र खोरसोर सौराहाले अहिले कतारलाई दुई वटा हात्ती उपहार पठाउने भएको छ । 

कतारका राजा अमिर शेख तमिम बिन हमाद अल थानीको राजकीय भ्रमणका दौरानमा कन्जरभेसन कूटनीतिलाई जोड दिँदै नेपालका तर्फबाट दुई हात्ती उपहार दिन लागिएको हो । 

उपहार दिने सम्बन्धमा राजा थानीको राजकीय भ्रमणका क्रममा एमओई हुने र प्रक्रिया मिलाएर पठाउन एक डेढ महिना लाग्ने बताइएको छ । चितवन राष्ट्रिय निकुञ्जका सूचना अधिकारी गणेशप्रसाद तिवारीले उपहार सम्बन्धमा वन मन्त्रालयमा एमओइ भएपछि मात्र कहिले पठाइने भन्ने सम्बन्धमा टुङ्गो लाग्ने बताउनुभयो । 

“प्रजनन केन्द्रमा जन्मिएर हुर्काएका दुई हात्ती कतारलाई उपहार दिने कुरा एमओइ पछि मात्र कहिले पठाउने भन्न सकिन्छ” उहाँले भन्नुभयो । प्रजनन केन्द्रमा २०७५ असोज २३ मा पुजाकलीबाट जन्मिएकी रुद्रकली र २०७६ असोज ८ गते कोशीकलीबाट जन्मिएको खगेन्द्र प्रसादलाई कतारलाई उपहार दिन लागिएको हो । यी दुवै जङ्गली हात्ती रोनाल्डोका सन्तान हुन् । 

प्रजनन केन्द्रका प्रमुख मनिपुरन चौधरीले उपहार दिने हात्तीलाई सबै सीप सिकाइएको जानकारी दिनुभयो । “पाँच वर्षको खगेन्द्र र छ वर्षकी रुद्रकलीलाई आवश्यक सबै सीप सिकाइएको छ” उहाँले भन्नुभयो । 

२०४४ सालमा भारतबाट १६, म्यानमार २ र थाइल्याण्डवाट २ गरी २० वटा हात्तीबाट स्थापना गरिएको हात्ती प्रजनन केन्द्रले अहिलेसम्म ६२ वटा हात्तीलाई जन्म दिई सकेको छ । यहाँ ५५ वटालाई तालिम दिइएको केन्द्रले जनाएको छ । यहाँ जन्मिएका मध्ये ४ वटाको मृत्यु भएको छ । प्रजनन केन्द्रमा हुर्काएर तालिम दिइएको हात्ती उपहार दिएको यो पहिलो हो । 

यसअघि नेपालले सन् १९८५ देखि हालसम्म विभिन्न देशलाई २६ वटा गैँडा, १० वटा घडियाल गोही, एक ब्वाँसो र २ चितुवा उपहार दिई सकेको छ ।