.jpg)
कोकिला ढकाल
इलाम, चैत २२ गते । देशलाई पुनःसंरचना गरेर ल्याइएको व्यवस्थाले देशलाई आर्थिक नोक्सान भएको भन्दै राष्ट्रिय प्रजातन्त्र पार्टी नेपालका अध्यक्ष राजेन्द्र लिङ्देनले प्रदेश सभा खारेज गर्नु उत्तम हुने बताउनुभएको छ ।
अहिले हरेक नेपालीको टाउकोमा ऋणको भारी भएको भन्दै जनताले तिरेको करले वडा सदस्यदेखि पूर्व राष्ट्रपति, पूर्व उप-राष्ट्रपतिसम्मलाई खाने मेलो भएको उहाँको भनाइ थियो।
इलाम सदरमुकाममा आयोजित चुनावी घोषणा सभालाई सम्बोधन गर्दै अध्यक्ष लिङ्देनले प्रदेश सभाको भने कुनै काम नै नभएकाले केन्द्रीय सरकार, सरकार मातहतका आयोग बलियो बनाउनुपर्ने बताउनुभयो । संवैधानिक निकाय राजनीतिक दलको भर्ती केन्द्र नबनाई स्वस्थ प्रतिस्पर्धाबाट प्रमुख ल्याउँदा ती निकाय पनि बलियो र काम गर्नसक्ने क्षमताको हुने लिङ्देनको भनाइ थियो ।
नेपालमा बनिने सरकार भारत र चीनको इच्छा अनुसार चल्नुपर्ने बाध्यताले गर्दा देशमा कुनै पनि सरकार र सरकारले गरेका काम दिगो नभएको भन्दै अध्यक्ष लिङ्देनले प्रत्यक्ष निर्वाचित प्रधानमन्त्री हुनुपर्ने आफूहरुको धारणा रहेको बताउनुभयो ।
इलाम-२ मा वैशाख १५ मा हुन लागेको उप-निर्वाचनका सन्दर्भमा अध्यक्ष लिङ्देनले आफ्नो पार्टीले जित्नै पर्छ भन्ने नभएपछि अन्य ठूला दलहरुलाई भोट नहालेर ती दलहरुलाई सुध्रिन जनताले चेतावनी दिनुपर्ने बताउनुभयो ।
अर्को एक प्रसङ्गमा अध्यक्ष लिङ्देनले देश चलाउने व्यवस्था नै कामजोर भएको भन्दै तस्करीमा संलग्न भएका ठूला नेतालाई कमजोर व्यवस्थाकै कारण छोड्नु पर्ने बाध्यता रहेको बताउनुभयो । राप्रपा नेपालले इलाम -२ को उप-निर्वाचनमा लक्ष्मी गुरुङको उम्मेद्वारी घोषणा गरेको छ ।
इलाम सदरमुकाममा आयोजित चुनावी सभामा उम्मेद्वारी घोषणा गर्दै राप्रपा अध्यक्ष राजेन्द्र लिङ्देन । तस्बिर : कोकिला ढकाल
