पेटमा पटुका कसेर
या दरो इँजार बाँधेर
बरु भोकभोकै बस्ने
अर्काको नचोर्ने
मागेर कसैको विशेष दयामा
विशेष सम्बन्धम पेट नभर्ने
आत्मासम्मानी
स्वाभिमानी
कतै खोज्न जानु छ भने
प्रिय मित्र राष्ट्रहरू नेपाल पस्नु
०
नेपालीहरूलाई
आफ्नो भूगोलभन्दा प्रिय
उसको भोक हँुदैन
आफू जन्मेको माटोभन्दा प्रिय
उसकी श्रीमतीको ओठ हुँदैन
सुन
अरू अरूले
ओठ र शरीरहरू चुम्लान
नेपालीहरू माटो चुम्छन
०
ऊ जन्मँदा
पहिला
सास फेर्ने क्रममा
उसले माटोको गन्ध पायो
र
ऊ जन्मदा
आमाको गर्भबाट
जन्मदै माटो भिजाएर जन्मियो
माटोको रसात्मकताले उसलाई रसायो
माटोको उर्वराले उसलाइ हुर्कायो
र यो जम्मै उसको इन्द्रियमा व्याप्त छ ।
