म फूलका कुरा उठाउन चाहन्छु
कवितामा फूलको प्रसङ्ग
फूल सदृश नरम र कोमल हुन्छन् कविताहरू
मनलाई छुने र आकर्षित गर्ने
फूलहरू छर्छन् वासना कवितामा
फूल सुन्दर र सुगन्धित हुन्छ
कविता सरह ।
फूललाई सुरक्षा गर्ने जिम्मेवारी काँडाको हुन्छ
उसको कोमलता र सुन्दरताको रक्षा गर्ने
फूलमा जस्तै कवितामा रम्ने अभिरुचि राख्ने
कवितानुरागी हुन्छन्
अल्पायुमै कविता फूल सदृश अमर हुन्छ ।
कविताले फूल सरह आँधी बेहरीको
सामना गर्नुपर्ने हुन्छ
असिनाको कटु प्रहार
आरोप, प्रत्यारोप र तीक्ष्ण प्रहार
कटु वचन सहन बाध्य हुन्छन् कविताहरू आलोचनाको
कविताहरू आलोच्य हुन्छन् प्रशंसित पनि
कविताले हिँड्न पर्छ सङ्कटको बाटो
अँध्यारो र अप्ठ्याराहरूको बाटो
कविता सङ्कटमय पथ हिँड्छ
उज्यालोको चाहना र अभिलाषा बोकेर
कविताले आक्रमण सहन्छ
बेथिति र कुरूपताहरूको
अन्योल र अस्पष्टताहरू विस्थापित गर्छ
सूर्यका किरणहरूले कञ्चन हिमाल चुमे सरह
फूलले, कविताले धर्तीलाई चुम्छ
अविच्छिन्न माया गर्छ ।
