प्रेमराज सिम्खडा
कालीकोट, असार १६ गते । लगातारको वर्षाले ठाउँ–ठाउँमा आएको पहिरोले कर्णाली करिडोर बन्द भएको छ । तीन दिन यताको पानीले कर्णाली करिडोरको खुलालु जारकोट खण्डमा दुई ठाउँमा आएको पहिरोले करिडोर बन्द भएको हो ।
जिल्ला प्रहरी कार्यालय कालीकोटका सूचना अधिकारी प्रहरी निरीक्षक सुबराज बमले रास्कोटको सान्नीघाटभन्दा दुई किलोमिटर अगाडि आएको पहिरोले पचालझरना र पलाँताको सडक अवरोध भएको बताउनुभयो ।
करिडोरको लालीघाट खण्ड पनि निकै जोखिम छ । सान्नीत्रिवेणी गाउँपालिकाको वडा नं १ लुसा गाउँको डिलबाट पहिरो झरिरहेकाले करिडोरको यात्रा निकै जोखिम छ ।
शुक्रबार पहिरो झरेका कारणले केही समय सडक अवरोध भएको थियो भने अहिले पनि उक्त क्षेत्र जोखिममा रहेको छ । फुकोट कर्णाली अर्धजलासय आयोजनाको काम भइरहेकाले स्काभेटरले सडक पञ्छाएर आउजाउ गराए पनि निरन्तर हिलो माटो बगिरहेकाले कुन बेला ठूलो पहिरो आउछ भन्न नसकिने प्रहरीको भनाइ छ ।
करिडोरबाट गाउँ जोड्ने ग्रामीण सडक समेत रहेकाले वर्षातको समयमा माटो बग्ने र सडकमा थुप्रीने भएकाले सडक अवरोध हुने थालेका छन् । सान्नीत्रिवेणी गाउँपालिका वडा नं २ का अनिल बिष्टले गाउँ जोड्ने सडक अलपत्र भएकाले त्यहाँबाट पानीसँगै बग्ने माटोले करिडोरमा क्षती पुयाउने गरेको बताउनुभयो ।
