राजु लामिछाने
रुकुमपश्चिम, मङसिर २ गते । रुकुम–पश्चिमको त्रिवेणी गाउँपालिका –८ को एक घरमा आगलागी भएको छ । स्थानीय पहलसिंह खड्काको घरमा आगलागी हुँदा करिब २५ लाख रुपियाँ बरावरको क्षति भएको बताइएको छ ।
वडा अध्यक्ष नन्दराम खड्काका अनुसार शुक्रबार दिउँसो खड्काको घरमा आगलागी भएको हो । घरमा जोडिएको बिद्युत् सट भएर आगलागी भएको हुनसक्ने उहाँले बताउनुभयो । घरमा कोही नभएकाबेला आगलागी भएको थियो । स्थानीयले आगो नियन्त्रणमा लिएका छन् ।
आगलागीबाट खड्काको घरभित्रका सामान जलेको छ । घरमा रहेको नगद दुई लाख रुपियाँ, तीन तोला सुन, लत्ता कपडा, खाद्यान्नसहित करिब २५ लाख रुपियाँ बराबरको क्षति भएको वडा अध्यक्ष खड्काले जानकारी दिनुभयो । उहाँका अनुसार क्षतिको सबै विवरण आउन बाँकी छ ।
