मेरा परेलाहरूबाट
आँसुको नदी बगिरहँदा
मैले सोचेथेँ–
यो दीर्घप्रेमको नमुना हो
नसा नसामा दौडिरहेको
तातो तातो रगतले
सम्झाइरहन्थ्यो मलाई
यो तातो रगत
तिम्रो प्रेमको दीर्घ निशानी हो ।
सपनीमा उसलाई देख्दा–
विपनीमा हरपल
उसलाई नै सम्झिरहँदा
निश्चयका साथ
मलाई लाग्थ्यो
सायद यो पनि
दीर्घप्रेमको एउटा अनुभव हो ।
यसरी
दीर्घप्रेमको परिभाषालाई
आफैँले बनाउँदै हिँडेँ
आफैँले व्याख्या गर्दै हिँडेँ
जब मैले
वास्तविकताको धरातलमा
आफूलाई एक्लै पाएँ
लाग्यो दीर्घप्रेम
मात्र पानीको फोका हो,
आफूले आफूलाई नै गर्ने प्रेम
दीर्घप्रेम हो
जीवन बाँच्नका लागि
एक मुस्कान नै
दीर्घप्रेमको निसानी हो,
दीर्घप्रेमको निसानी हो ।
