- प्रणालीगत सुधारमा जोड : निर्देशन दिने र ठेकेदार तर्साउने जस्ता सतही शैलीले विकास सम्भव नहुने भन्दै सभापति थापाले संरचनागत र प्रणालीगत परिवर्तनको खाँचो औँल्याउनुभएको छ।
- कानुनी अड्चनको अन्त्य : पूर्वाधार निर्माणमा ढिलासुस्ती हटाउन दशकौँ पुराना सडक ऐन र सार्वजनिक खरिद ऐन लगायत करिब तीन दर्जन कानुन संशोधन वा खारेज गर्नुपर्ने उहाँको जिकिर छ।
- पाँचवर्षे रूपान्तरणको खाका : आयोजना छनोटमा लागत-लाभ विश्लेषण (Cost-Benefit Analysis) र कार्यान्वयनमा 'समयको मूल्य' लाई प्राथमिकता दिएर आगामी पाँच वर्षभित्र पूर्वाधार क्षेत्रमा कायापलट गर्ने प्रतिबद्धता व्यक्त गर्नुभएको छ।
काठमाडौँ, माघ २६ गते । नेपाली कांग्रेसका सभापति गगनकुमार थापाले नेपालको पूर्वाधार विकासको गति सुस्त हुनुमा सतही कारण मात्र नभई प्रणालीगत समस्या मुख्य दोषी रहेको बताउनु भएको छ । विकासको परम्परागत शैली अब काम नलाग्ने उहाँको तर्क छ ।
निर्देशन दिने, ठेकेदारलाई तर्साउने वा कर्मचारीलाई गाली गर्ने जस्ता ‘जादुमयी’ शैलीले विकास सम्भव नहुने भन्दै उहाँले अबको पाँच वर्षमा पूर्वाधार क्षेत्रमा कायापलट गर्ने स्पष्ट खाका आफूसँग रहेको दाबी गर्नुभएको हो ।
सामाजिक सञ्जालमा एक भिडियो सन्देश जारी गर्दै थापाले नारायणगढ–बुटवल सडक खण्ड, पूर्व–पश्चिम राजमार्ग र मेलम्ची खानेपानी आयोजनाजस्ता राष्ट्रिय गौरवका आयोजनाहरूको दुरावस्थालाई चित्रण गर्दै विकासको परम्परागत शैली अब काम नलाग्ने निष्कर्ष सुनाउनुभयो । थापाले देशका ठुला आयोजनाहरू वर्षौँसम्म अलपत्र पर्ने र सहरका सडकहरूमा समन्वय अभावमा बारम्बार खन्ने पुर्ने काम भइरहने स्थितिलाई विकासको ‘कन्तबिजोग’ को संज्ञा दिनुभयो ।
सडक बनेलगत्तै खानेपानीले खन्ने, त्यसपछि ढल र फाइबरका लागि पुनः खन्ने प्रवृत्तिले लागत मात्र बढाएको भन्दै उहाँले यसबाट देशले ठुलो अवसरको लागत(अपरच्युनिटी कस्ट) गुमाइरहेको बताउनुभयो । लामो समयदेखि संसद्, संसदीय समिति र मन्त्रालयमा रहँदा आफूले पूर्वाधार निर्माणमा देखिएका समस्यालाई नजिकबाट नियालेको उहाँले उल्लेख गर्नुभयो ।
‘हामीले बेलाबेलामा ठेकेदारलाई तर्साएर वा आयोजना स्थलमा पुगेर निर्देशन दिएर ताली त पाउँला, तर समस्याको समाधान हुँदैन,’ थापा भन्नुहुन्छ, ‘लक्षणमा मात्र काम गरेर हुँदैन, जरामा पुगेर उपचार गर्नुपर्छ ।’
कानुन नै बाधक, तीन दर्जन ऐन फेर्नुपर्ने पूर्वाधार निर्माणमा ढिलासुस्ती हुनुको प्रमुख कारण पुरानो कानुनी संरचना रहेको थापाको ठम्याइ छ । ४८ वर्ष पुरानो सडक ऐन र २० वर्ष पुरानो सार्वजनिक खरिद ऐनले आजको आवश्यकतालाई सम्बोधन गर्न नसक्ने उहाँले बताउनुभयो ।
आफ्नो अध्ययनले पूर्वाधार समयमै सम्पन्न गर्नका लागि करिब तीन दर्जन कानुन संशोधन, परिमार्जन वा खारेज गर्नुपर्ने देखाएको उहाँले जानकारी दिनुभयो । कानुन नफेरी बाहिर जति हल्ला गरे पनि परिणाम नआउने उहाँको जिकिर छ ।
योजना छनोटदेखि नै बेथिति सुरु हुने भन्दै थापाले राजनीतिक पहुँच र दबाबका भरमा योजना पार्ने प्रवृत्तिको अन्त्य गर्नुपर्नेमा जोड दिनुभयो । अब आयोजना छनोट गर्दा ‘लागत–लाभ विश्लेषण’अनिवार्य गरिनुपर्ने र कसैले पनि तजबिजी अधिकार प्रयोग गर्न नमिल्ने गरी कानुनमै व्यवस्था गर्ने तयारी आफूले गरेको उहाँले बताउनुभयो ।
‘समयको मूल्य’ बुझ्नुपर्ने सार्वजनिक खरिद प्रक्रियामा ‘कम लागत’ (लो बिडिङ) लाई मात्र प्राथमिकता दिँदा गुणस्तर र समय दुवै गुमेको भन्दै थापाले अब ‘समयको मूल्य’ (टाइम भ्यालु अफ मनि) लाई प्राथमिकता दिनुपर्ने प्रस्ताव गर्नुभएको छ । भारतलगायत अन्य देशको अभ्यास हेरेर जसले छिटो काम सक्छ, उसलाई प्राथमिकता दिने गरी कानुनी व्यवस्था मिलाउनुपर्ने उहाँको भनाइ छ ।
पूर्वाधार क्षेत्रमा सुशासन कायम गर्न पारदर्शिता र सामाजिक परीक्षणलाई अनिवार्य गर्नुपर्नेमा थापाले जोड दिनुभयो । नियमनकारी निकायलाई बलियो बनाउनुपर्ने तर कामै गर्न नसक्ने गरी हस्तक्षेप गर्न नहुने उहाँको तर्क छ ।
साथै, उहाँले ठुला आयोजना घोषणा गर्ने तर स्रोतको सुनिश्चितता नहुने परिपाटी अन्त्य गर्नुपर्ने बताउनुभयो । सार्वजनिक सम्पत्तिको मुद्रीकरण(मोनेटाइजेशन) र हाइब्रिड एन्युटी मोडेल (ह्याम) जस्ता नयाँ वित्तीय उपकरणहरूको प्रयोग गरेर पूर्वाधारमा लगानी जुटाउन सकिने उहाँले औँल्याउनुभयो ।
पाँच वर्षमा रूपान्तरणको प्रतिबद्धता विगतमा मन्त्रीले हातमा चाबुक लिएर ठेक्का तोड्छु भन्दैमा वा कसैलाई गाली गर्दैमा समस्या समाधान नभएको भन्दै थापाले अब संस्थागत क्षमता र कानुनी सुधारबाट मात्र नतिजा आउने दाबी गर्नुभयो ।
उहाँले भन्नुभयो, ‘जादु गरेको जस्तो चमत्कारिक तरिकाले समस्या हल हुन्छ भन्ने सोच्यौँ भने अर्को पाँच वर्ष पनि खेर जान्छ । म यो पाँच वर्षभित्र पूर्वाधार क्षेत्रमा रूपान्तरणकारी परिवर्तन गरेर देखाउने विश्वास दिलाउन चाहन्छु ।’
दश–बाह्र वर्ष लाग्ने आयोजनाहरू एक–दुई वर्षमै सम्पन्न गर्ने र गुणस्तरीय काम गर्ने प्रणाली स्थापित गर्ने प्रतिबद्धता व्यक्त गर्दै थापाले नागरिकले भोग्नुपरेको सास्ती र हैरानी अन्त्य गर्न नेपाली कांग्रेसले नेतृत्वदायी भूमिका खेल्ने बताउनुभयो ।
