खोरेतविरुद्व खोप अभियान सुरु

राधा लुइटेल 

फिदिम, फागुन ३ गते। पाँचथरसहित कोशी प्रदेशका १४ जिल्लामा चौपायालाई खोरेत रोगविरुद्व खोप अभियान सुरु भएको छ। स्वस्थ्य दूध र मासु उत्पादन र वस्तुको निर्यात प्रवर्धनमा टेवा पुर्‍याउन खोरेतविरुद्वको खोप लगाउन थालिएको हो।

खोरेतका कारण चौपायाले दिने उत्पादन घट्नुका साथै बजार प्रवर्धनमा समेत नकरात्मक प्रभाव परेको भन्दै सरकारले गाईं, भैँसी र बङ्गुरलाई खोरेतविरुद्व खोप अभियान चलाएको भेटनेरी अस्पताल तथा पशु सेवा विज्ञ केन्द्र पाँचथरका पशु सेवा विज्ञ केन्द्रका सूचना अधिकारी निरोजकुमार भट्टराईले बताउनुभयो।

खोप अभियानमा आवश्यक पर्ने भ्याक्सिन सम्बन्धित जिल्लाका भेटेरिनेरी अस्पताल तथा पशु सेवा विज्ञ केन्द्रमार्फत गाउँ र नगरपालिकालाई उपलब्ध गराइएको भेटरिनेरी अस्पताल तथा पशु सेवा विज्ञ केन्द्र पाँचथरका प्रमुख रामनारायण साहले जानकारी दिनुभयो।

खोप अभियानको अनुगमन पशुपक्षी तथा मत्स्य विकास निर्देशनालय कोशी प्रदेश र सम्बन्धित जिल्लाका भेटेरिनेरी अस्पतालले गर्नेछन्। अभियान अन्तर्गत पाँचथर जिल्लाका सात वटै स्थानीय तहले बिहीबारदेखि पशु चौपायालाई खोप लगाउने अभियान सुरु गरेका छन्। पाँचथरमा मात्रै करिब ७८ हजार पशुलाई खोप दिइने भेटेरिनेरी अस्पताल तथा पशुपक्षी तथा मत्स्य विकास निर्देशनालय कोशी प्रदेशको तथ्याङ्क अनुसार प्रदेश भर १४ लाख गाई, तीन लाख ७४ हजार भैँसी र सात लाख १५ हजार बङ्गुर छन्। 

खोप अभियानको सुरुवात गर्दै फिदिम नगरपालिका मेयर मित्रप्रसाद काफ्लेले स्वस्थ मासु र दूध उत्पादनले मानव स्वास्थ्यमा सकरात्मक प्रभाव पार्नका साथै आय आर्जनमा वृद्धि हुने भएकाले सम्पूर्ण किसानलाई आआफ्ना पशुमा खोप लगाउन आग्रह गर्नुभयो।