गोकर्ण पौडेल
तुलसिपुर, मङ्सिर २२ गते । नेकपा (एमाले) का महासचिव शङ्कर पोखरेलले देश बलियो बनाउन बलियो राजनीतिक शक्तिको आवश्यकता रहेको बताउनुभएको छ । तुलसीपुर उपमहानगरपालिका –१९ को प्रशासनिक भवनको आज उद्घाटन गर्दै उहाँले यस्तो बताउनुभएको हो ।
विगतभन्दा वर्तमानमा धेरै राजनीतिक उपलब्धि प्राप्त भएको उहाँको भनाइ छ । तुलसीपुर उपमहानगरपालिका –१९ का वडाध्यक्ष प्रेमनाथ योगीको अध्यक्षता एवम् लुम्बिनी प्रदेशका प्रथम मुख्यमन्त्री शङ्कर पोखरेलको प्रमुख आतिथ्यतामा भवन उद्घाटन गरिएको हो ।
उहाँले जनतामा निराशाको खेती गर्नेहरूका कारण समाजमा अराजकता बढेको बताउनुभयो । महासचिव पोखरेलले राजनीतिक अस्थिरताका कारण विकासमा समस्या सिर्जना भएको बताउनुभयो ।
कार्यक्रममा तुलसीपुर उपमहानगरपालिकाका नगरप्रमुख टीकाराम खड्काले पालिकाको अब १९ वटै वडाले आफ्नै भवनबाट सेवा प्रारम्भ गरेको बताउनुभयो । उहाँले यसै महिनामा कृषि, पशु शाखा, वडा र स्वास्थ्य संस्थाले आफ्नै भवनबाट सेवा सुरु गरेको बताउनुभयो । नगरप्रमुख खड्काले वडाको प्रशासनिक कार्यालयसम्म आउने सडकलाई कालोपत्रे सुरुवात गरिने बताउनुभयो ।
तुलसीपुर उपमहानगरपालिकाको १९ तोप्पापानीमा २०७४ सालमै शिलान्यास भए पनि निर्माण कार्य अधुरो रहेको थियो । वडाध्यक्ष प्रेमनाथ योगीले घोराही आँखा अस्पताल र बिजौरी छिल्लीकोट सडक खण्डकै नजिकमा सबै वडावासीको मध्य बिन्दुमा वडा कार्यालय भवन निर्माण गरिएको बताउनुभयो ।
