भेरी अस्पतालमा सर्पदंशका १२० बिरामीको उपचार

सिराज खान
नेपालगन्ज, असोज २ गते । पश्चिम नेपालका विभिन्न जिल्लाहरूबाट रिफर भएका बिरामीहरूको उपचार गर्दै आएको भेरी अस्पतालले यस वर्ष विषालु सर्पले टोकेका १२० जनाभन्दा बढी बिरामीको उपचार गरेको जनाएको छ ।

यस वर्ष वैशाखदेखि हालसम्म विषालु सर्पले टोकेका विभिन्न जिल्लाबाट आएका १२० जनाभन्दा बढी बिरामीको भेरी अस्पतालमा उपचार भएको अस्पतालका एनेस्थेसियोलोजिष्ट डा. पारस पाण्डेले बताउनुभयो ।

उहाँले अस्पताल आउँदा आउँदै र उपचारकै क्रममा सर्पदंशका १६ जना बिरामीको ज्यान गएको पनि बताउनुभयो । अस्पताल ल्याउन ढिलाइ गर्दा वा समयमै सर्पले टोकेको थाहा नपाउँदा उनीहरूको मृत्यु भएको डा. पाण्डेको भनाइ छ ।

भेरी अस्पतालका अनुसार पश्चिम नेपालका तराईका जिल्लामा सर्पदंशका बिरामी विगतभन्दा बढ्न थालेका छन् । सर्पदंशको उपचार हुने नेपालगन्जस्थित भेरी अस्पतालमा सर्पले टोकेका बिरामीको चाप पछिल्लो समय बढेको छ ।

सर्पदंशका बिरामीले नै अस्पतालको आकस्मिक कक्ष र आइसियु वार्ड यतिबेला भरिन थालेको अस्पतालले जनाएको छ ।

भेरी अस्पतालका सूचना अधिकारी डा. सङ्केत कुमार रिसालले लुम्बिनी कर्णाली र सुदूरपश्चिमका विभिन्न जिल्लास्थित अस्पतालबाट रिफर भएर सर्पले टोकेका बिरामी उपचारका लागि आउन थालेपछि भेरी अस्पताल भरिभराउ हुन थालेको बताउनुभयो ।

सर्पले टोकेर समयमा अस्पताल ल्याउन सके बिरामीको ज्यान जोगाउन सकिने भएकाले झारफुकमा नलाग्न र तत्काल अस्पताल पुर्‍याउन चिकित्सकहरूले पटक पटक सुझाव दिँदै आउनुभएको छ ।

सूचना अधिकारी डा. रिसालका अनुसार सर्पले टोकेमा गाउँघरमा झारफुकको भरपर्दा यसले झनै जोखिम बढाउने गरेको छ । यस्ता परम्परागत विधिमा भरपर्दा ज्यानै जोखिममा परेपछि अन्तिममा अस्पतालमा ल्याउँदा ज्यान जोगाउन निकै मिहिनेत गर्नुपर्ने उहाँको भनाइ छ ।

भेरी अस्पतालको तथ्याङ्क अनुसार यसवर्ष सर्पदंशका बिरामीको चाप बढ्नुका साथै गत वर्षभन्दा दोब्बर बढीको मृत्यु भइसकेको छ ।

नेपालमा गोमन करेट र भाइपर प्रजातिका विषालु सर्पले धेरैलाई टोक्ने गरेको पाइन्छ । चिकित्सकका अनुसार गोमन र करेट सर्पले टोक्दा न्युरो टक्सेभेनोममा असर गर्ने भएकाले मस्तिष्क र स्नायुमा प्रभाव पार्छ, जसका कारण मानिसहरूको मृत्यु हुने जोखिम धेरै हुन्छ । भाइपर सर्पमा हेमोटक्सिन हुन्छ जसले शरीरमा रगतलाई खराब गर्छ ।

भेरी अस्पतालले तराईमा पाइने कोब्रा करेट जस्ता सर्पले टोकेका बिरामीलाई भेन्टिलेटरमा राखेर उपचार गर्ने गरेको छ । भाइपर प्रजातिका सर्पले टोकेर आउने बिरामीमा रगत पातलो हुने रगत बग्ने कलेजो र मिर्गौलामा असर पार्दा डाइलासिस गरी रगत चढाएर उपचार गर्ने गरेको अस्पतालले जनाएको छ ।