मतदानको समय सकियो : मतपेटिका संकलन सुरु (फोटो फिचर)
निर्वाचन आयोगले स्थानीय तह निर्वाचनका लागि तोकेको मतदानको समय सकिएको छ। आयोगले शुक्रबार बिहान ७ बजेदेखि अपराह्न ५ बजेसम्म मतदानको समय तोकेको थियो।
शीर्ष नेता कसले कहाँबाट गर्नुभयो मतदान (फोटो फिचर)
शुक्रबार देशभर एकसाथ स्थानीय तहको निर्वाचन भएको छ। मतदाताको उपस्थिति उत्साहजनक रहेको निर्वाचन आयोगले जनाएको छ।
छिटपुट घटनाबाहेक देशभर मतदान शान्तिपूर्ण र उत्साहजनक
शुक्रबार बिहान ७ बजेदेखि अपरान्ह ५ बजेसम्म एकै चरणमा भएको स्थानीय तह निर्वाचन छिटपुट घटनाबाहेक देशभर शान्तिपूर्ण र उत्साहजनक रूपमा सम्पन्न भएको छ।
प्रधानमन्त्रीद्वारा स्याङ्जा जीप दुर्घटनाप्रति दुःख व्यक्त
प्रधानमन्त्री एवम् कांग्रेस सभापति शेरबहादुर देउवाले शुक्रबार स्याङ्जामा भएको जीप दुर्घटनाप्रति दुःख व्यक्त गर्नुभएको छ।
हावाहुरीले मतदान स्थलको टेन्ट भत्कायो
हावाहुरीले सिरहाको विभिन्न मतदनस्थलमा लागेको टेन्ट भत्काएको छ।
सर्लाहीमा झडप भएको मतदान स्थलमा सेना खटाइयो
केही मतदान केन्द्रमा झडप भएर मतदान प्रभावित भए पनि सर्लाहीका अधिकांश मतदान केन्द्रमा मतदान जारी छ।
काभ्रेका चार स्थानमा मतदान स्थगित
काभ्रेका चार मतदान केन्द्रमा मतदान रोकिएको छ। जिल्लाको चौरीदेउराली गाउँपालिका–६ स्थित प्रभा उच्च मावि मतदान केन्द्रमा नेपाली कांग्रेस र नेकपा माओवादी केन्द्रले नेकपा एमालेले एकलौटी रुपमा मतदान गरेको आरोप लगाउँदै एमालेका बुथ प्रतिनिधिमाथि हातपात गरेपछि मतदान रोकिएको हो।
अवरुद्ध मतदानः केही सुचारु, केहीमा प्रयास जारी
स्थानीय निर्वाचन अन्तर्गत शुक्रबार बिहानदेखि देशैभरमा शान्तिपूर्ण ढंगबाट मतदान कार्य जारी छ।
बाबुराम भट्टराईलाई निर्वाचन आयोगको २४ घण्टे स्पष्टीकरण
काठमाडौं, वैशाख ३० गते। निर्वाचन अयोगले पूर्वप्रधानमन्त्री डा. बाबुराम भट्टराईलाई स्पष्टीकरण सोधेको छ। शुक्रबार स्थानीय तहको मतदान गर्दा भट्टराईले मतपत्र सार्वजनिक गरेकोप्रति गम्भीर ध्यानाकर्षण भएको उल्लेख गर्दै आयोगले २४ घण्टे स्पष्टीकरण सोधेको हो। आयोगका प्रवक्ता शालिग्राम शर्मा पौडेलले सार्वजनिक गर्नुभएको विज्ञप्तिमा भनिएको छ, ‘निर्वाचन (कसूर तथा सजाय) ऐन, २०७३ को दफा ९ को उपदफा (२) बमोजिमको उक्त कसूरका सम्बन्धमा पत्र प्राप्त भएको समयले २४ घण्टाभित्र स्पष्ट जवाफ पेश गर्न पत्राचार गरेको छ।’’
सिन्धुपाल्चोकमा दुई केन्द्रमा झडप : पुनः मतदानका लागि पहल जारी
चित्र मिजारसिन्धुपाल्चोक, वैशाख ३० गते । नेपाली कांग्रेस र एमाले कार्यकर्ताबीच मतदानका विषयमा विवाद हुँदा झडप भएपछि स्थितिलाई नियन्त्रणमा ल्याउन बाह्रबिसे नगरपालिका–३ क्षमादेवी मावि मतदान केन्द्रमा झडप भएको छ ।स्थितिलाई नियन्त्रणमा लिन सशस्त्र प्रहरीले चार राउण्ड हवाईफाइरिङ गरेको थियो । इलाका प्रहरी कार्यालय बाह्रबिसेका प्रहरी निरीक्षक मुकेश न्यौपानेले झडपमा एमाले र कांगे्रसका चारजना कार्यकर्ता घाइते भएका छन् ।उक्त झडपलाई नियन्त्रणमा ल्याउन सुरक्षाकर्मीले हवाई फयारिङ गर्नु परेको जानकारी दिनुभयो । झडपपछि मतदान रोकिएको छ । अहिले सर्वदलीय बैठक बसिरहेको छ । बैठकमा सबै दल मतदान सुचारु गर्न सहमतीमा पुगेको इन्स्पेक्टर न्यौपानेले बताउनुभयो ।त्यस्तै, मतदानमा खटिएका कर्मचारीलाई काँगे्रस प्रतिनिधिले ले मःम, फुर्टी खाजा ल्याइदिएपछि त्रिपुरासुन्दरी गाउँपालिका–३ धुस्कुनमा विवाद भएको छ । सुरक्षाकर्मी र काँग्रेस कार्यकर्ताबीच झडप भई मतदान रोकिएको छ ।धुस्कुनस्थित महेन्द्रप्रताप मावि मतदान केन्द्रमा भइरहेको मतदान समयमा मःम र अन्य खाजा ल्याएपछि सुरक्षाकर्मीले खाजा खुवाउन नदिएपछि झडप भएको थियो ।झडपले उग्ररुप लिएपछि सो मतदान केन्द्रको सबै मतपेटीका सुरक्षाकर्मीले मतदान केन्द्रको कोठाभित्र सुरक्षित तरिकाले राखेको स्थानीय सञ्चारकर्मी सीमा तामाङले जानकारी दिनुभएको छ । यसबारे जिल्ला प्रहरी कार्यालयले घटनाको विवरण संकलन गरिरहेको जनाएको छ । उक्त मतदान केन्द्रमा दुई हजार नौ सय मतदाता छन् । अहिलेसम्म एक हजार मत खसेको छ ।
उपत्यकामा सुरक्षा चेकजाँच (फोटो फिचर)
स्थानीय तहको चुनावको दिन शुक्रबार बिना अनुमतिपत्र चलाइएका सवारी साधनलाई प्रहरीले नियन्त्रणमा लिएको छ।
दिउँसो २ बजेसम्म ४१ प्रतिशत मतदान
निर्वाचन आयोगले स्थानीय तहको निर्वाचन अन्तर्गत शुक्रबार दिउँसो २ बजेसम्म ४१ प्रतिशत मतदान भएको जनाएको छ।
उपत्यकामा निर्वाचन शान्तिपूर्ण
काठमाडौं, वैशाख ३० गते । देशका ७५० वटा स्थानीय तहमा एकैसाथ निर्वाचन भइरहेको छ । मतदान केन्द्रहरुमा मतदाताको उपस्थिति पनि उत्साहजनक रहेको निर्वाचन आयोगले जनाएको छ । केही जिल्लाका मतदान केन्द्रमा छिटपुट झडपका घटना भए पनि अन्य ठाउँमा भने शान्तिपूर्ण रुपमा नै मतदान भएको आयोगको भनाइ छ ।काठमाडौं उपत्यकाका तीन जिल्लामा पनि मतदान प्रकृया शान्तिपूर्ण रुपमा चलिरहेको सम्बन्धित जिल्लाका प्रमुख जिल्ला अधिकारीहरुले बताउनुभएको छ । उपत्यकाका तीन जिल्ला काठमाडौं, भक्तपुर र ललितपुर जिल्लाका सबै मतदान केन्द्रमा शान्तिपूर्ण रुपमा मतदान भइरहेको प्रजिअको भनाइ छ । काठमाडौं जिल्लाका प्रजिअ गोविन्दप्रसाद रिजालका अनुसार जिल्लामा दिउँसो १ बजेसम्म ४० प्रतिशत मत खसेको बताउनुभएको छ । विहान ७ बजेदेखि सुरु भएको मतदान प्रकृयामा विहानदेखि नै मतदाताको उत्साहजनक उपस्थिति पाइएको उहाँले बताउनुभएको छ । उपत्यकाको सुरक्षा व्यवस्था कडा रहेकाले मतदान केन्द्रमा कुनै अवरोध सृजना नभएको उहाँले बताउनुभयो । उपत्यकाको ललितपुर जिल्लामा पनि शान्त र उत्साहपूर्ण तरिकाले मतदान भइरहेको प्रजिअ घनश्याम उपाध्यायले बताउनुभयो । जिल्लाका सबै मतदान केन्द्रको सुरक्षा व्यवस्था कडा पारिएकाले मतदाताहरुले ढुक्क भएर मत खसालिरहेको उहाँको भनाइ छ । अनुगमनका क्रममा विहान १० बजेसम्म मदाताको उपस्थिति बाक्लो रहेको तर, त्यसपछि केही पातलो उपस्थिति देखिएको उहाँले बताउनुभयो । काठमाडौं र ललितपुर जिल्लामा जस्तै भक्तपुर जिल्लामा पनि उत्साहपूर्ण रुपमा मतदान चलिरहेको प्रजिअ रुद्रादेवि शर्माले बताउनुभयो । जिल्लामा दिउँसो १ बजेसम्म ३५ प्रतिशत मत खसिसकेको उहाँको भनाइ छ । बिहानपख भन्दा दिउँसो मतदाताको उपस्थिति भने केही पातलो पाइएको उहाँको भनाइ छ ।
एमाले उपाध्यक्ष पाण्डेद्वारा मतदान
पूर्वअर्थमन्त्री एवम् नेकपा (एमाले)का उपाध्यक्ष सुरेन्द्र पाण्डे मतदान गर्नुभएको छ । शुक्रबार स्थानीय तह निर्वाचनअन्तर्गत पूर्वी चितवनको राप्ती ५ स्थित भण्डार अस्पतालको मतदान केन्द्रबाट उपाध्यक्ष पाण्डेले मतदान गर्नुभएको हो ।
गृहमन्त्रीद्वारा ज्योतिनगरमा मतदान
काठमाडौँ, वैशाख ३० गते । स्थानीय तह निर्वाचनको क्रममा आज गृहमन्त्री बालकृष्ण खाँणले रुपन्देही जिल्लाको तिलोत्तमा नगरपालिका वडा नं. ८ मा रहेको मतदान केन्द्रबाट मतदान गर्नुभएको छ ।उहाँका प्रेस संयोजक मधुसूदन भट्टराईका अनुसार, गृहमन्त्री खाणले त्यहाँको ज्योतिनगरस्थित ज्योति माविमा मतदान गर्नुभएको हो ।
काठमाडौँ महानगरको मतगणना राष्ट्रिय सभा गृहमा
काठमाडौं महानगरको मत गणना राष्ट्रिय सभा गृहमा हुने भएको छ ।
भयमुक्त वातावरणमा निर्वाचन सम्पन्न गर्न सरकार प्रतिवद्ध छ : गृहमन्त्री खाण
काठमाडौं, वैशाख २९ गते। गृहमन्त्री बालकृष्ण खाणले सरकार भयमुक्त वातावरणमा निर्वाचन सम्पन्न गर्न प्रतिवद्ध रहेको उल्लेख गर्नुभएको छ। बिहीबार मतदातालाई निर्वाचनमा सहभागी हुन अपील गर्नुहुँदै गृहमन्त्री खाणले यस्तो बताउनुभएको हो। गृहमन्त्री खाणको अपीलमा भनिएको छ, ‘‘सरकार स्वच्छ, निष्पक्ष धाँधलीरहित र शान्तिपूर्ण तरिकाले भयमुक्त वातावरणमा निर्वाचन सम्पन्न गर्न प्रतिबद्ध छ।’’उहाँले सम्पूर्ण नेपाली दाजुभाइ दिदीबहिनी र बुवा आमालाई निर्भयतापूर्वक विवेकसम्मत रूपले आफ्नो टोल, गाँउ र नगर विकासका लागि सक्षम प्रतिनिधि छनोट गर्न आफ्नो अमूल्य अभिमत प्रदान गर्न अनुरोध गर्नुभएको छ। शुक्रबार (वैशाख ३० गते) एकसाथ देशभर ७५३ स्थानीय तहको निर्वाचन हुँदैछ।
सीमा नाकामा चुनाव लक्षित सुरक्षा गस्ती
काठमाडौं,वैशाख २९ गते। भोलि (शुक्रबार) देशभर एकसाथ ७५३ स्थानीय तहमा मतदान हुँदैछ। सरकारले स्थानीय निर्वाचनलाई मध्यनजर गर्दै देशभरको सुरक्षा व्यवस्था कडा बनाएको छ। सरकारको सुरक्षा योजना अनुसार सीमा नाकामा चुनाव लक्षित सुरक्षा गस्ती बढाएको छ। चुनावी सुरक्षा योजना अनुसार मंगलबार राति मंगलबार राति १२ बजेदेखि सीमा नाका बन्द छन्। नाका बन्द भए पनि सरकारले मतदान सम्पन्न नहुँदासम्म सीमा सुरक्षा गस्तीलाई निरन्तरता दिइने नेपाल प्रहरीका प्रवक्ता विष्णुबहादुर केसीले जानकारी दिनुभयो। सरकारले सीमा सुरक्षाको निगरानीका लागि प्रदेशगत सुरक्षा रणनीति बनाएको छ। प्रदेश नम्बर १ प्रदेश प्रहरी कार्यालयका प्रहरी उपरीक्षक नवीनराज राईले भारत र चीनसँग सीमा जोडिएका नाकामा सुरक्षा व्यवस्था कडा पारिएको जानकारी दिनुभयो। प्रदेश १ मा भारत र चीनसँग सीमा जोडिएको छ। चिनियाँ नाकाबाट भन्दा भारतीय सीमा क्षेत्रबाट आवतजावतको चाप बढी हुनेहुँदा प्रहरीले भारतीय सीमा क्षेत्रको निगरानीलाई प्राथमिकता दिएको छ। भारतसँग सीमा जोडिएका सुनसरी, मोरङ, झापा र इलाम जिल्लाका सीमा क्षेत्रमा सुरक्षा टोली तैनाथ छन् । भारततर्फ खुला सीमा रहेकाले यी जिल्लालाई सुरक्षा रणनीतिको दृष्टिकोणले महत्वका साथ हेरिएको छ। प्रदेश प्रहरीले छिमेकी देशसँग समन्वय गरेर चुनाव लक्षित गस्ती बढाएको राईले उल्लेख गर्नुभयो। मधेस प्रदेशका सबै जिल्ला भारतसँग सीमा जोडिएका छन्। खुला सीमालाई ध्यान दिँदै मधेस प्रदेश प्रहरी कार्यालयले सुरक्षा रणनीति बनाएको छ। मधेस प्रदेश प्रहरी कार्यालयका प्रवक्ता प्रहरी उपरीक्षक तुलबहादुर कार्कीका अनुसार भारतबाट हुने आवागमन रोक्न भारतीय सुरक्षा निकायसँग समन्वय गरिएको छ। प्रहरीले आठ जिल्लामध्ये वीरगञ्जको सीमा नाकालाई महत्वकासाथ हेरेको छ। ‘‘वीरगञ्जका सीमा नाकालाई सुरक्षाको दृष्टिकोणले चुनौतीको रुपमा हेरिएको छ। अन्य जिल्लाका सीमा नाकाबाट हुनसक्ने खतरालाई उत्तिकै महत्व दिएका छौँ’, कार्कीले भन्नुभयो। सीमा सुरक्षाको दृष्टिकोणले प्रदेश १ र मधेस प्रदेश भन्दा बागमती प्रदेशमा जोखिम कम देखिन्छ। प्रदेश प्रहरी कार्यालय बागमतीका प्रवक्ता एवम् प्रहरी उपरीक्षक खड्कबहादुर खत्रीका अनुसार स्थानीय सुरक्षा समितिको निर्णय बमोजिम सीमा क्षेत्रको सुरक्षा व्यवस्था कडा पारिएको छ । प्रदेशअन्तर्गत चीनसँग सीमा जोडिएका रसुवागढी र तातोपानी नाकालाई पूर्ण रुपमा सिल गरिएको छ। प्रदेश प्रहरी कार्यालय गण्डकी प्रदेशका प्रवक्ता एवम् प्रहरी उपरीक्षक मीनबहादुर घलेल अत्यावश्यक बाहेकका सवारी साधनलाई ओहोर/दोहोर गर्न पूर्ण रुपमा रोक लगाइएको बताउनुभयो। गण्डकीका मुस्ताङ र नवलपरासी पूर्वका सीमा नाकामा सिल गरिएको छ। गोरखा र मनाङ जिल्लाका सीमा नाका भौगोलिक जटिलताका कारण पहिलेदेखि नै बन्द छन्। प्रदेश प्रहरी कार्यालय लुम्बिनी प्रवक्ता मनहरि डंगोलका अनुसार भारतसँग सीमा जोडिएका जिल्लाको सीमा नाकामा सुरक्षा व्यवस्था कडा पारिएको छ। विशेषगरी रुपन्देही, बाँके र बर्दिया जिल्लाको सुरक्षा व्यवस्था कडा पारिएको हो। कर्णाली प्रदेशसँग सीमा जोडिएका चिनियाँ नाका पहिलेदेखि नै बन्द छन्। कर्णाली प्रदेशका प्रहरी प्रवक्ता हिराबहादुर पाण्डेका अनुसार कोरोनाको पहिलो लहरमै बन्द हिल्सा नाका अहिलेसम्म खुलेको छैन। नाका बन्द भए पनि सुरक्षा टोली सीमा क्षेत्रमा तैनाथ छ। प्रदेश १ र मधेस प्रदेशजस्तै सुदूरपश्चिम प्रदेशमा भारतसँग खुला सीमा रहेका जिल्लामा सुरक्षा व्यवस्था कडा पारिएको छ। सुदूरपश्चिम प्रहरी कार्यालयका प्रवक्ता एवम् प्रहरी वरिष्ठ उपरीक्षक भोलाबहादुर रावलका अनुसार सीमा सुरक्षा चौकी (बीओपी)ले लगातार गस्ती गरिरहेको छ। कञ्चनपुरको गड्डाचौकी, कैलालीको श्रीनगर र कालाकुण्ड नाकाबाट अत्यावश्यकबाहेक आवतजावत बन्द गरिएको छ।
स्थानीय तह निर्वाचनको सम्पूर्ण तयारी पूरा
निर्वाचन आयोगले यही वैशाख ३० गते हुने स्थानीय तह सदस्य निर्वाचन, २०७९ को सम्पूर्ण तयारी पूरा गरेको छ।
मतदानस्थलमा मोबाइल लान नपाइने
निर्वाचन आयोगले शुक्रबार हुने स्थानीय निर्वाचनको मतदानस्थलमा मोबाइल, क्यामरा वा फोटो खिच्ने जस्ता अन्य कुनै पनि साधन लान नपाइने जनाएको छ ।
शान्तिपूर्ण वातावरणमा मतदान हुन्छ : मन्त्री कार्की
जयकृष्ण यादव इनरुवा, वैशाख २९ गते। नेपाल सरकारका प्रवक्ता तथा सञ्चार तथा सूचना प्रविधिमन्त्री ज्ञानेन्द्रबहादुर कार्कीले स्थानीय तह निर्वाचनलाई उत्सवको रुपमा लिन आग्रह गर्नुभएको छ। मन्त्री कार्कीले विश्वसनीय, स्वच्छ, निष्पक्ष, भयरहित र शान्तिपूर्ण वातावरणमा मतदान हुने भएकाले निर्धक्का साथ आफूलाई मन परेको उम्मेदवारलाई मतदान गर्न अपील गर्नुभएको छ। सुनसरीको बराहक्षेत्र नगरपालिका १० नम्बर वडामा मतदान गर्न आइपुग्नुभएका मन्त्री कार्कीले गोरखापत्रकर्मीसँग बिहीबार कुराकानी गर्नुहुँदै देशबासीलाई निर्वाचनलाई उत्सवको रुपमा लिई सबैको सहभागितामा आफूलाई मनपरेको उम्मेदवार वा पार्टीलाई मत दिई नयाँ यात्रा विकास र समृद्धिको यात्रामा योगदान गर्न आग्रह गर्नुभयो। विकास र समृद्धिसहित संघीयताको अनुभूति गराउने यात्राका रुपमा स्थानीय तहको निर्वाचनलाई लिन उहाँले आग्रह पनि गर्नुभयो। निर्वाचनको सबै तयारी पूरासुनसरीको सदरमुकाम समेत रहेको इनरुवा नगरपालिकाका सहित १२ वटै स्थानीय तह निर्वाचनको सबै तयारी पूरा भएको छ। मतदान केन्द्रमा घेराबेरा, सुरक्षा र मतदान सामग्रीहरु तथा केन्द्रमा आवश्यक सामग्रीसहित तह निर्वाचनको सबै तयारी पूरा भएको हो। मतदान अधिकृत र सुरक्षा टोलीले १२ वटै पालिकाका सबै मतदान केन्द्रमा मतदान स्थलमा दलहरुसँग र उम्मेदवारका प्रतिनिधिसँग छलफल गरेको छ। सबै मतदान अधिकृतले निर्वाचन सुरक्षित र भयरहित बनाउन अत्यावश्यक सूचना जारी गरी ३ सय मिटर वरिपरिको क्षेत्रलाई मतदानस्थल घोषणा गर्दै मदिरा निषेध गरिएको छ। हातहतियार प्रदर्शन निषेधित क्षेत्रको सूचना जारी गरिएको मुख्य निर्वाचन अधिकृत कैलाश प्रसाद सुवेदीले जानकारी दिनुभयो। यहाँका सबै ५८१ मतदान स्थल तथा केन्द्र निर्माण गरिएको छ। महिला र पुरुषका लागि बेग्लाबग्लै लामको व्यवस्था गरिएको छ। ज्येष्ठ नागरिक, अपाङ्ग, गर्भवती र सुत्केरी, लैङ्गिक तथा यौनिक अल्पसङ्ख्यकले भने मतदान गर्न लाममा बस्नु नपर्ने गरी व्यवस्था मिलाएको सुवेदीले बताउनुभयो। यसैबीच, निर्वाचनका भारतीय सिमा नाका बन्द गरिएको छ। सुनसरीमा स्थानीय तह निर्वाचनका लागि तोकिएका उच्च संवेदनशील मतदान केन्द्रहरुमा उच्च सुरक्षा व्यवस्था पारिएको छ। त्यसैगरी, नेपाली काँग्रेसका नेता तथा पूर्व उपप्रधानमन्त्री विजयकुमार गच्छदारले सुनसरीको दुहवी नगरपालिका २ नम्बर वडामा मतदान गर्नुहुँदैछ। गच्छदारले स्थानीय नवीन शिशु आधारभूत मतदान केन्द्रमा मतदान गर्नुहुन्छ। यस्तै, कांग्रेसका केन्द्रीय तथा प्रदेश सांसद राजीव कोइरालाले सुनसरीको इनरुवा नगरपालिका १ नम्बर वडाका चान्दनी अधारभूत केन्द्रमा मतदान गर्नुहुन्छ। त्यसैगरी, संघीय साँसद एवम् पूर्व राज्यमन्त्री सीताराम मेहताले पनि सुनसरीको इनरुवा नगरपालिका वडा नम्बर २ को राजाजी मावि केन्द्रमा मतदान गर्नुहुने छ।
मतदान कार्यलाई सफल पार्न प्रमुख निर्वाचन आयुक्तको आग्रह
काठमाडौं, वैशाख २९ गते। निर्वाचन आयोगका प्रमुख निर्वाचन आयुक्त दिनेशकुमार थपलियाले स्थानीय निर्वाचनमा मतदान कार्यलाई सफल पार्न सहयोगको लागि अनुरोध गर्नुभएको छ। बिहीबार पत्रकार सम्मेलनमार्फत् उहाँले स्वच्छ, स्वतन्त्र र विश्सनीय र मितव्यायी वातावरणमा निर्वाचन सम्पन्न गर्ने गरी सहयोगका लागि सम्बद्ध सबैमा आग्रह गर्नुभयो। “प्रतिनिधिमूलक शासन व्यवस्थाको आधारशीला र लोकतन्त्रको सार्थक अभ्यास गर्ने माध्यम निर्वाचन हो”, उहाँले भन्नुभयो, “कानुन बमोजिम योग्यता पुगेका हरेक नागरिकलाई उम्मेदवार बन्ने, निर्वाचित हुने र मतदान गर्ने अवसर र अधिकार निर्वाचन आयोगले प्रदान गरेको छ।” उहाँले विचार, निष्ठा र सिद्धान्तबाट निर्देशित भएर मतदान गर्न तर, कुनै पनि पद, पैसा पहुँच, प्रलोभन वा आश्वासनमा नपर्न पनि उल्लेख गर्नुभयो।“आफ्नो विवेकको सही तरिकाले सही ठाउँमा प्रयोग गर्न सबै मतदातामा आह्वान गर्दछु। सबै तयारी पूरा भइसकेका छन्, शान्ति सुरक्षाको पूर्ण प्रत्याभूति हुनेगरी सुरक्षा व्यवस्था मिलाइएको छ”, उहाँले बताउनुभयो।मतदान कार्य सम्पन्न हुनासाथ सुरक्षित तवरबाट मतपेटिकाको आवश्यक ढुवानीको प्रबन्ध मिलाइएको उहाँले बताउनुभयो। सबै मतपेटिका संकलन भएपछि तत्काल मतगणना कार्य प्रारम्भ हुनेछ।यसैगरी, कुनै पनि मतदाता मतदानको अधिकारबाट बञ्चित नहोस् भनेर मतदाता नामावली रहेकाले परिचय-पत्र, नागरिकताको प्रमाण-पत्र, राष्ट्रिय परिचय-पत्र, राहदानी, जग्गा धनी प्रमाण पूर्जा लगायतका कुनै एक प्रमाणका आधारमा मतदान गर्ने आवश्यक प्रबन्ध मिलाइएको उहाँ बताउनुहुन्छ। “कुनै प्रश्न उठ्न नसक्ने गरी वातावरण तयार गर्न राजनीतिक दल, उम्मेदवार तथा सम्बद्ध सरोकारवालाको सहयोग हुने विश्वास व्यक्त गर्दछु”, उहाँले भन्नुभयो, “आफूलाई मन परेको निर्वाचन चिह्नमा स्वस्तिक छाप लगाइ सही तरिकाले निर्धकक मतदान गर्न हुन हार्दिक अनुरोध गर्दछु।”
निर्वाचनको सम्पूर्ण व्यवस्थापन चुस्त बनाएका छौँ : प्रधानमन्त्री देउवा
प्रधानमन्त्री शेरबहादुर देउवाले शुक्रबार (वैशाख ३० गते) हुन गइरहेको स्थानीय तहको निर्वाचनमा निर्धक्कसँग मतदान गरी आफ्नो मताधिकारको प्रयोग गर्न सम्पूर्ण देशबासीमा अपील गर्नुभएको छ।
उपत्यकाको सुरक्षा व्यवस्था कडा : तीन हजार सुरक्षाकर्मी परिचालन
काठमाडौं, वैशाख २९ गते। शुक्रबार हुने स्थानीय तहको निर्वाचनका लागि काठमाडौँको सुरक्षा व्यवस्था कडा पारिएको छ। देशको संघीय राजधानीसमेत रहेको काठमाडौंमा चुनाव केन्द्रित सुरक्षा व्यवस्था कडा पारिएको हो। नेपाल प्रहरीका प्रवक्ता विष्णुबहादुर केसीले काठमाडौं उपत्यकाका सबै मतदान केन्द्रमा सुरक्षाकर्मी दुई दिनदेखि खटिसकेको बताउनुभयो। उहाँका अनुसार सुरक्षाका लागि नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान विभागका गरेर तीन हजार सुरक्षाकर्मी र चार हजार पाँच सय म्यादी प्रहरी परिचालन गरिएको छ। सबै राजनीतिक दलबीच आपसी सम्बन्ध राम्रो रहेकाले मतदान अवधिभरको समय शान्तिपूर्ण नै रहने विश्वास प्रहरीको छ। ‘सबै राजनीतिक दलबीचको आपसी सम्बन्ध राम्रो छ। अहिलेसम्म सामान्य विवादबाहेक अन्य हिंसात्मक घटना भएका छैनन्। यसकारण मतदान अवधिसम्म नै अवस्था शान्तिपूर्ण हुने आशा छ,’ उहाँले भन्नुभयो। काठमाडौं जिल्लाका सहायक प्रमुख जिल्ला अधिकारी दीपक पौडेलका अनुसार जिल्लामा मतदान अवधिभर कुनै अप्रिय घटना नहोस् भनेर सुरक्षा व्यवस्थालाई कडा पारिएको छ। जिल्लाको भौगोलिक अवस्थालाई ध्यान दिएर तीन तहमा सुरक्षा व्यवस्था गरिएको उहाँको भनाइ छ। पहिलो घेरामा नेपाल प्रहरी, दोस्रो घेरामा सशस्त्र प्रहरी र तेस्रो घेरामा नेपाली सेना रहने पौडेलले बताउनुभयो। अप्रिय घटना भए पाँच मिनेटमै घटनास्थलमा सुरक्षाकर्मी पुग्ने व्यवस्था गरिएको छ। निर्वाचन सुरक्षा व्यवस्थाका लागि आवश्यक प्रक्रिया बुधबार नै पूरा भएको उहाँको भनाइ छ। ‘जिल्लाको हकमा कुनै अप्रिय घटना नहोस् भनेर सुरक्षा व्यवस्थालाई कडा पारिएको छ,’ पौडेलले भन्नुभयो, ‘चुनावका दिन कुनै अप्रिय घटना भए तत्काल सुरक्षाकर्मी पुग्ने व्यवस्था गरिएको छ।’यस्तै, भक्तपुर जिल्लाका प्रजिअ रुद्रादेवी शर्माले जिल्लाको सुरक्षा व्यवस्था कडा रहेको बताउनुभयो। जिल्लामा रहेका ७७ वटा मतदानस्थलमध्ये ३७ वटा संवेदनशील, ४० वटा सामान्य संवेदनशील मतदानस्थल रहेको उहाँको भनाइ छ । जिल्लाको हकमा १५ सय हाराहारीमा सुरक्षाकर्मी खटिएको शर्माको भनाइ छ। ‘जिल्लामा अतिसंवेदनशील मतदानस्थल छैनन्। तर, संवेदनशील र सामान्य संवेदनशील मतदानस्थल भएका कारण सुरक्षा व्यवस्थालाई कडा बनाएका छौँ,’ शर्माले भन्नुभयो।सँगै ललितपुरका सहायक प्रजिअ हरिप्रसाद पन्तले जिल्लाको सुरक्षा व्यवस्था कडा रहेको बताउनुभएको छ। ललितपुरमा १३१ मतदानस्थल र २८८ वटा मतदान केन्द्र छन्। हिंसात्मक गतिविधि नहोस् भनेर मतदान अधिकृतले राजनीतिक दलसँग सुरक्षा व्यवस्थासँग सम्बन्धि छलफलसमेत गरिराख्नुभएको छ।
सरकारी प्रेस पास भएका पत्रकारलाई ‘सवारी अनुमतिपत्र’ आवश्यक नपर्ने
काठमाडौं, वैशाख २९ गते। शुक्रबार हुने स्थानीय तहको निर्वाचनको दिन सरकारी निकायको प्रेस पास भएका पत्रकारलाई निर्वाचन आयोगले दिने सवारी अनुमतिपत्र आवश्यक नपर्ने भएको छ। निर्वाचन आयोगले बिहीबार यस्तो निर्णय गरेको हो। यो निर्णसँगै नेपाल सरकार र प्रदेश सरकारको आधिकारीक निकायबाट जारी भएका प्रेस पास हुने सञ्चारकर्मीले आयोगबाट सवारी साधनका लागि सवारी अनुमति पत्र लिनु नपर्ने भएको हो। ‘नेपाल सरकार वा प्रदेश सरकारको आधिकारिक निकायबाट जारी भएको प्रेस पास भएका सञ्चारकर्मीका हकमा त्यस्ता सञ्चारकर्मीले प्रयोग गर्ने सवारी साधनका लागि सवारी अनुमतिपत्र आवश्यक नपर्ने’, आयोगको निर्णयमा भनिएको छ। प्रेस पास नभएका सञ्चारकर्मीको हकमा सम्बन्धित सञ्चारगृहको आधिकारिक पत्रमार्फत् अनुरोध आएमा प्रमुख जिल्ला अधिकारी, काठमाडौंले अनुमतिपत्र जारी गर्नसक्ने आयोगले जनाएको छ। आयोगकी शाखा अधिकृत जयकला राईले सार्वजनिक गर्नुभएको विज्ञप्तिमा भनिएको छ, ‘प्रेस पास नभएका सञ्चारकर्मीको हकमा सम्बन्धित सञ्चारगृहको आधिकारिक पत्रमार्फत् अनुरोध भइ आएमा प्रमुख जिल्ला अधिकारी, काठमाडौंले सवारी अनुमतिपत्र जारी गर्न सक्ने।’’
