गोरखापत्र अनलाइन
बाल यौन दुरुपयोग कसुरमा दुई जना जेल चलान
काठमाडौं, असार ७ गते। जिल्ला अदालत काठमाडौंले पुर्पक्षका लागि दुई जनालाई जेल चलान गरेको छ। बाल यौन दुरुपयोग कसुरमा दुई जनालाई पुर्पक्षका लागि मंगलबार कारागार चलान गरिएको हो। कारागार चलान हुनेमा काभ्रेपलाञ्चोकको साविक सापिङ गाउँपालिका–४ घर भइ काठमाडौंको कागेश्वरी मनोहरा–८ बस्ने ४७ वर्षीय जनार्दन अधिकारी र काठमाडौंकै कागेश्वरी मनोहरा–७ का ५१ वर्षीय राजनकुमार पौडेल रहेका छन्।चाबहिलस्थित एउटा कलेजको कोर्ष को–अर्डिनेटर र शिक्षकले नाबालिकामाथि यौन दुर्व्यवहार गरेको अभियोग छ। तीन जना नाबालिकाको तर्फबाट अभिभावकले प्रहरी वृत्त गौशालामा उजुरी दिएका थिए।उजुरीपछि प्रहरीले पीडितहरुको प्रसूति गृह अस्पताल थापाथलीमा स्वास्थ्य परीक्षण गराएको थियो। उक्त घटनालाई प्रहरीले गम्भीरताका साथ लिएर सूक्ष्म तवरले अनुसन्धान सुरु गरेको थियो।महानगरीय प्रहरी परिसरका प्रवक्ता दिनेशराज मैनालीका अनुसार सो कार्यमा संलग्न फरार रहेकाले प्रहरीको विशेष टोलीले पक्राउ गरेको हो।पक्राउ परेका दुवैमाथि मुलुकी अपराध (संहिता) ऐन, २०७४ को परिच्छेद-१८ को दफा २२५ को बाल यौन दुरुपयोग गर्न नहुनेसम्बन्धी कसूरमा मुद्दा चलेको र अनुसन्धान सकिएपछि आज जिल्ला अदालत काठमाडौंले पुर्पक्षका लागि डिल्लीबजार कारागार पठाउन आदेश दिएको हो।
बेहुलाले साइकलमै चढाएर भित्राए बेहुली
अमरराज नहर्की तनहुँ, असार ७ गते । झट्ट सुन्दा तपाईलाई विश्वास नलाग्न सक्छ बेहुलाले साइकलमा सवारी मात्रै नभई बेहुलीलाई समेत साईकलमै राखेर घर भित्राउनु भएको छ भन्दा । सामाजिक सन्देश प्रवाह गर्नका लागि मङ्गलबार तनहुँमा सवारीको लागि साइकलको प्रयोग गरी विवाह गरिएको छ । व्यास नगरपालिका–१० का २६ वर्षिय विनोद सापकोटाले साइकलमा चढेर गएर साइकलमा नै राखेर बेहुलीलाई घरमा भित्राउनु भएको छ । मितव्ययी तरिकाले विवाह गर्नुपर्छ भन्ने सन्देस प्रवाह गर्न र प्रेट्रोलियम प्रदार्थको खपत घटाउन सन्देश दिने मुख्य उद्देश्यले साइकलको सवारी प्रयोग गरेको बेहुला सापकोटाले बताउनुभयो । ‘भड्किलो तरिकाले विवाह गर्ने प्रचलनको अन्त्यको लागि पहल गर्नुपर्छ भनेर साईकल प्रयोग गरेको हुँ, बेहुला सापकोटाले भन्नुभयो । बेहुला सापकोटा बेहुली सङ्गीता भुजेल लिन साइकलमा ४ किलो मिटर दुरी पार गरी सदरमुकाम दमौलीमा पुग्नु भएको थियो । साइकलमा बेहुलीलाई अगाडि राखेर चलाउँदा देख्नेहरु दङ्ग परेका थिए । बेहुलासँगै जन्ती पनि साइकलमै गएका थिए । सिङगार पटार गरेका बेहुलो र बेहुलीलाई साइकलमा सवार गरेको देखेर देखेपछि रोक्दै टिकटक बनाउने, सेल्फी खिच्ने भेटिए । दुलहीका बुबा पूर्णबहादुर भुजेलले दाईजोको पनि माग नभएको र खर्च धेरै नर्गन बेहुलाको पक्षले अनुरोध गरेको जानकारी दिनुभयो । ‘यस्तो विवाहले विवाहको लागि ऋण खोज्नु पर्दैन भन्ने सन्देश दिएको छ’ भुजेलले भन्नुभयो । बेहुला सापकोटा साईकलका खेलाडी हुनुहुन्छ । उहाँले ईलामदेखि मुगुको रारासम्म साइकलमै यात्रा गर्नु भएको थियो । यस्तो विवाहले सन्देश प्रवाह गरेकाले खुसी लागेको पराशर माध्यमिक विद्यालयका प्रधानाध्यापक तथा बेहुलाका भिनाजु रामदत्त पौडेलले बताउनुभयो । ‘इन्धन बचाउने मात्रै नभई मानिसलाई निरोगी पनि बनाउने भएकोले प्रयोग बढाउनु पर्ने यसरी गरिएको विवाहले साइकलको महत्व बढ्ने भएकोले खुसी लागेको छ’ प्रधानाध्यापक पौडेलले भन्नुभयो । सापकोटा दिदी मनु सापकोटा समाजलाई सन्देश प्रवाह गर्ने भएकालेले साईकलमा सवारी गर्न भाइको आग्रहलाई परिवार तथा आफन्त सबैले मानेको बताउनुभयो । ‘भाइले विवाह भड्किलो बनाउन हुँदैन साईकलको सवारी प्रयोग गर्छुले भने हामीले पनि सहमती जनायौं’ मनुले भन्नुभयो ।
आगामी निर्वाचनसम्म गठबन्धन हुन्छ : डा. देउवा
गणेश पौडेलपर्वत, असार ७ गते। नेपाली कांग्रेसका केन्द्रीय सदस्य डा. आरजु राणा देउवाले देशमा लोकतन्त्र संस्थागत गर्नका लागि आगामी संघ र प्रदेशको निर्वाचनसम्म गठबन्धन कायमै रहने बताउनुभएको छ। नेपाली कांग्रेस पर्वतले मंगलबार कुश्मामा आयोजना गरेको स्थानीय तहमा निर्वाचित जनप्रतिनिधिको बधाई तथा शुभकामना कार्यक्रममा बोल्नुहुँदै डा. देउवाले यस्तो बताउनुभएको हो। लोकतन्त्रको रक्षा र देशको राष्ट्रियता बचाउनका लागि आगामी निर्वाचनसम्म गठबन्धन धानेर लैजानुपर्ने आवश्यकता रहेको उहाँको भनाइ छ । उहाँले भन्नुभयो, ‘‘आगामी निर्वाचनसम्म गठबन्धन गरेरै जाने तयारी छ। अहिलेको गठबन्धन कसरी भएको हो भन्ने कुरा सबैलाई अवगत नै छ। सोही अनुसार सबै नेता कार्यकर्ताले बुझ्नुपर्ने आवश्यकता छ।’’ नेपाली कांग्रेस देशकै ठूलो पार्टी भएकाले नेतालाई जिम्मेवारी दिने कुरामा पनि चुनौती रहेको उहाँको भनाइ छ। ‘‘फेरि पनि निर्वाचनमा सबैलाई टिकट नहुनसक्छ। तर, पार्टीका कार्यकर्ताले त्याग गरेर पनि पार्टीलाई बलियो बनाउन र जिताउन लाग्नुपर्छ’’, उहाँले भन्नुभयो। कांग्रेसका हरेक कार्यकर्तालाई मिलाएर लैजान पार्टी सभापतिले अधिकतम पहल गर्नुभएको उहाँको भनाइ छ। उहाँले कांग्रेसका जनप्रतिनिधिलाई सुशासन कायम गरेर जनताले देख्ने विकास तथा पारदर्शी काम गर्न आग्रह गर्नुभयो। ‘‘जनप्रतिनिधिले जनताले देख्ने काम गर्नुपर्छ। त्यत्तिले मात्र पुग्दैन। पारदर्शी र जिम्मेवार भएर काम गर्नुहोला’’, उहाँले भन्नुभयो। नेता कार्यकर्तालाई सामाजिक संजालमा जथाभावी नलेख्नसमेत उहाँले आग्रह गर्नुभयो। ‘पार्टीमा भएका असहमतिलाई पार्टीभित्रै राखेर हल गर्न सकिन्छ। विचार र सिद्धान्त बुझेर पार्टीमा लागेका नेता कार्यकर्ताले पार्टीको विरुद्धमा समाजिक संजालमा लेख्नु राम्रो हुँदैन’’, उहाँले भन्नुभयो। कार्यक्रममा नेपाली कांग्रेसका पूर्वकेन्द्रीय सदस्य एवं संविधानसभा सदस्य अर्जुनप्रसाद जोशीले पार्टीलाई बलियो बनाउन सबैले त्याग गरेर जान तयार हुनुपर्नेमा जोड दिनुभयो। कार्यक्रममा नेपाली कांग्रेस पर्वतका निर्वतमान सभापति खिमप्रसाद भुसाल, नेपाली कांग्रेस पर्वतका पूर्वसभापति एवं महाधिवेशन प्रतिनिधि नवराज गुरुङ, तरुण दलका अध्यक्ष विद्वान गुरुङ्ग लगायतले सम्बोधन गर्नुभयो।
कुलेखानीको पानी काठमाडौंमा ल्याइन्छ : खानेपानी मन्त्री
पानी पोखरी र प्रशोधन केन्द्र १४ सय मिटर अग्लो दरबान डाँडामा बनाइने, दुई वर्षभित्रै लिफ्टिङ गरेर लाने प्रस्ताव
लेवनानका प्रधानमन्त्रीसँग प्रधानसेनापति शर्माको भेट
काठमाडौं, असार ७ गते। लेवनानको औपचारिक भ्रमणमा रहनुभएका प्रधानसेनापति प्रभुराम शर्माले लेवनानका प्रधानमन्त्री नाजीव आदमी मिकातीसँग शिष्टाचार भेट गर्नुभएको छ। नेपाली सेनाको जनसम्पर्क तथा सूचना निर्देशनालयका अनुसार भेटमा लेवनानको शान्ति स्थापनार्थ नेपाली शान्ति सैनिकको भूमिका, नेपाल र लेवनानबीचको सैनिक सम्बन्ध तथा दुई राष्ट्रबीच रहिआएको पारस्परिक सम्बन्ध एवम् हितका विषयमा छलफल भएको छ।लेवनान भ्रमणमा रहनुभएका प्रधानसेनापति शर्माले त्यहाँका रक्षामन्त्री माउरिस स्लिम, सभामुख नाबी बेरी र त्यहाँको आर्मी फोर्सका प्रमुख जोसेफ खलिल औन सँगसमेत शिष्टाचार भेट गर्नुभएको छ। असार ४ गते लेवनान प्रस्थान गर्नुभएका प्रधानसेनापति शर्मा लेवनानबाटै असार १३ गते अमेरिका प्रस्थान गर्नुहुनेछ। अमेरिका भ्रमण सकेर शर्मा असार १९ गते स्वदेश फिर्ता हुनुहुनेछ।
मिलेमतोमा चालक अनुमतिपत्र जारी गरेको आरोपमा यातायातका कर्मचारीविरुद्ध मुद्दा
गैरकानुनीरुपमा सवारी चालक अनुमति पत्र जारी गरेको आरोपमा फोटोकपी सञ्चालकसहित यातायात व्यवस्थाका कर्मचारीविरुद्ध मुद्दा दायर भएको छ।
थप दुई जनामा हैजा पुष्टि
टेकुस्थित शुक्रराज ट्रपिकल तथा सरुवा रोग अस्पतालमा थप दुई जनामा हैजा पुष्टि भएको छ।
काठमाडौं महानगर र ३३ संस्थाबीच निःशुल्क सार्वजनिक शौचालय सञ्चालन गर्ने सम्झौता (सूचीसहित)
काठमाडौं, असार ७ गते। काठमाडौं महानगरपालिकासँग हालसम्म विभिन्न ३३ संघसंस्थाबीच निःशुल्क सार्वजनिक शौचालय सञ्चालन सम्बन्धमा सम्झौता भएको छ। बैङ्क, रेष्टुरेन्ट, विद्यालय, प्रकाशन गृह, विजनेस कम्प्लेक्ससहितका संघसंस्थाका प्रतिनिधिबीच सोमबार सम्झौता भएको हो। महानगरप्रमुख वालेन्द्र शाह, उपप्रमुख सुनिता डंगोल र प्रमुख प्रशासकीय अधिकृत लोकनाथ पौड्यालको रोहवरमा भएको सम्झौतामा महानगरकातर्फबाट निर्देशक नुरनिधि न्यौपाने र दोस्रो पक्षकातर्फबाट प्रतिनिधिले हस्ताक्षर गर्नुभयो। आगामी पाँच वर्षका लागि भएको उक्त सम्झौतामा यसरी उपलब्ध गराइएका शौचालयको मर्मत सम्भार गर्ने, सरसफाइ गर्न आवश्यक सामग्री तथा पानी, सुगन्धका सामान व्यवस्था गर्ने जिम्मा दोस्रो पक्षकै हुनेछ। यसबापत सेवा लिन करकाप वा प्रोत्साहन नगर्ने सम्झौतामा उल्लेख गरिएको छ। सर्वसाधारण प्रयोगकर्तालाई सार्वजनिक शौचालय चिन्न सजिलो होस् र भनेर सबै सार्वजनिक शौचालयको पहिचान एउटै हुनका लागि संकेत चिन्ह तयार पारिएको छ। गोलो रेखाभित्र नीलो पृष्ठभूमि, त्यसको माथिल्लो भागमा नेपाली भाषामा सेतो अक्षरले ‘सार्वजनिक शौचालय’ लेखिएको छ। बीच भागमा सेतो रङ्मै महिला र पुरुषको चिह्न रहेको छ। संकेत चिह्नको पुछारमा अंग्रेजी भाषामा ‘पब्लिक ट्वाइलेट’ लेखिएको छ। यसरी सञ्चालन भएका शौचालयको अवस्था अनुगमन तथा मूल्याङ्कन गर्न दुवै पक्षबाट एक/एक जना प्रतिनिधि तोकिने र उनीहरुले हरेक चार महिनामा प्रतिवेदन प्रस्तुत गर्ने जनाइएको छ। सम्झौता गरिएका संघ संस्था टायम्स स्क्वायर, लङ् एण्ड बार, बालुवाटार पशुपति भ्यु होटल एण्ड रेष्टुरेन्ट, बालकुमारी टोलडेन्टल भिल्ला, वडा नं. १४, बल्खु देवयानी इन्टरनेशनल नेपाल प्रा. लि. अन्तर्गत क) पिजा हट, वडा नं. १ दरबारमार्ग ख) केएफसी, वडा नं. १ दरबारमार्ग ग) केएफसी, वडा नं. ६ बौद्धडाक गल्वी कोरियन हाउस, ल्याकसु गल्ली, वसन्तपुरहोटल रत्नज्योती, पेरिसडाँडानेक्सस ग्लोबल भिसा एण्ड इमिग्रेसन प्रा. लि, शंखमुलखानेकुरा प्रा. लि., गौशालासांग्रिला डिभलपमेन्ट बैङ्क, बालुवाटारबेबिलोन नेशनल स्कुल, शान्तिनगरओटिसी किचेन रेष्टुरेन्ट, बालुवाटारनेपालय पब्लिकेसन, डिल्लीबजारबसुन्धरा एण्ड गोङ्गबु एरिया रेष्टुरेन्ट, बसुन्धरागोमा लक्ष्मी इन्टरनेशनल, ठमेलघराना लञ्च एण्ड बार, बानेश्वरकामना सेवा विकास बैङ्क, कुलेश्वर, बौद्ध, ठमेल, ज्ञानेश्वर, कलंकी, भीमसेनगोला, नयाँ बानेश्वर, न्युरोड, सिटी एक्सप्रेस मनी ट्रान्सफर, कमलादीनेम इन्स्टिच्युट फर मेडिकल एजुकेसन प्रा लि, पुतलीसडक आरडीएक्स बार प्रा. लि. ठमेलनेपालगञ्ज विरयानी, डिल्लीबजार पिपलबोट कार्निभल रेष्ट्रो एण्ड मिटिङ्, बिजुलीबजार बार्दली रेष्ट्रो एण्ड मिटिङ्, शंखमुलनेशनल विजनेस ट्रेड सेन्टर, कलंकीसांग्रिला डिपलपमेन्ट बैङ्क, बालुवाटारबिन्का लङ्, छाउनीप्रोग्रेसियो विस्ट्रो पिबीज रेष्टुरेन्ट, बौद्ध मिलाल्याण्ड डिभलपमेन्ट प्रा.लि., कलंकी क्रिम्पजी एडभान्चर हव, बौद्धबर्गर हब एण्ड केसीए चिकेन, बिजुलीबजार अनुपम फुडल्याण्ड, बत्तीसपुतलीरिट्रिप क्याफे, बौद्धचिकेन स्टेशनस्तुपा हब, बौद्धनबिल बैंकसँग यसअघि नै सम्झौता भएको थियो। यस पश्चात् दुई सय ५० वटा शौचालय सञ्चालनमा आउनेछन्।
तीन बुँदे सहमति कार्यान्वयन गर्न माग
गृहमन्त्री बालकृष्ण खाणसँग धर्मेन्द्र बास्तोला अध्यक्ष रहेको नेपाल कम्युनिष्ट पार्टी (बहुमत) को टोलीले भेट गरेको छ ।
केकी अधिकारीको 'सिल्ली फो'
काठमाडौं, असार ७ गते । केकी अधिकारीको मुख्य भूमिका रहेको फिल्म ‘सिल्ली फो’को ट्रेलर सार्वजनिक गरिएको छ । कमेडी जनरामा निर्माण भएकोे फिल्ममा अभिनेत्री अधिकारीले नायिका बन्न गरेको संर्घषलाई देखाइएको हो ।राज बहादुर सानेको निर्देशनमा बनेको फिल्म ह्याप्पी फिल्मस् प्रालीको व्यानरमा निर्माण भएको हो । फिल्ममा मनोज डिके निर्माता र विशाल श्रेष्ठ सह-निर्माताको रुपमा छन् ।फिल्ममामा रवीन्द्र झा, राजाराम पौडेल, दिनेश रेग्मी, भुगोल कार्की, रमेश बजगाईं, अनिता लामिछाने, दीपक थापा, पुर्णचन्द्र पोखरेल (मामाजी), अनिता श्रेष्ठ, सरस्वती रम्जाली मगर, रेजिना थापा, राज गौतम (केशव), अम्बर बहादुर विष्ट (सागर), सौजन बोहोरा जयमन बिश्वकर्माको अभिनय रहेको छ ।सिनेमामा दिव्य सुवेदी, वीरेन्द्र परियार, नरेन्द्र आलेको छायांकन, शिव विकको कोरियोग्राफी, पुरुषोत्तम न्यौपानेको संगीत, तारा थापा ‘किम्भे’को सम्पादन, अनन्त घिमिरेको कलर, मदन बास्तोलाको भीएफएक्स छ ।फिल्म आगामी असार ३१ गतेबाट प्रदर्शनमा आउन भएको छ ।
प्रतिनिधिसभाको अर्को बैठक बिहीबार बस्ने
काठमाडौं, असार ७ गते। प्रतिनिधिसभाको अर्को बैठक बिहीबार दिउँसो १ बजे बस्ने भएको छ। संघीय संसद् सचिवालयका अनुसार प्रतिनिधिसभाको अर्को बैठक असार ९ गते बिहीबार दिउँसो १ बजे बैठक बस्नेछ। राष्ट्रिय सभाको अर्को बैठक भने असार ८ गते बुधबार दिउँसो १ बजे बस्नेछ। प्रतिनिधिसभा बैठकले बिरुवा संरक्षण र बीउबिजनसम्बन्धी विधेयकमाथि राष्ट्रियसभाबाट भएको संशोधन सर्वसम्मतिले स्वीकृत गरेको छ। प्रतिनिधिसभाको बैठकमा कृषि तथा पशुपन्छीमन्त्री महिन्द्र राय यादवले ‘विरुवा संरक्षण (पहिलो संशोधन) विधेयक, २०७६’ र बीउबिजन (दोस्रो संशोधन) विधेयक, २०७६ माथि राष्ट्रियसभाबाट भएको संशोधनमाथि विचार गरियोस्’ भन्ने प्रस्ताव प्रस्तुत गर्नुभएको थियो। ‘विरुवा संरक्षण (पहिलो संशोधन) विधेयक, २०७६’ माथि राष्ट्रियसभाबाट भएको संशोधनमाथि विचार गरियोस् भन्ने प्रस्तावमाथिको छलफलमा भाग लिँदै सांसद प्रेम सुवाल, गङ्गा चौधरी सत्गौवा, बिमला विक र सरिताकुमारी गिरी लगायतले रैथाने बिरुवाको संरक्षण गर्नुपर्ने, किसानलाई समयमै मल बीउबिजन उपलब्ध गराउने, निकुञ्ज क्षेत्र आसपासका नागरिकका कृषि उत्पादन जङ्गली जनावरले नष्ट गर्ने गरेको भन्दै त्यस्ता घटना न्यूनीकरण गर्न सरकारले ध्यान दिनुपर्ने बताउनुभएको थियो। ‘बीउबिजन (दोस्रो संशोधन) विधेयक, २०७६ माथि राष्ट्रियसभाबाट भएको संशोधनमाथि विचार गरियोस्’ भन्ने प्रस्तावमाथिको छलफलमा भाग लिँदै सांसद गङ्गा चौधरी सत्गौवा र सरिताकुमारी गिरीले स्वदेशमा बीउ उत्पादन गर्ने प्याकेज निर्माण गर्नुपर्ने, हाइब्रिड बीउबिजनको प्रयोगका बढवा दिँदै गर्दा किसानलाई तालिम र प्रविधि पनि उपलब्ध गराउनुपर्ने बताउनुभयो। छलफलमा उठेका जिज्ञासाको जवाफ दिँदै कृषिमन्त्री यादवले रैथाने बिरुवा र बीउबिजनलाई संरक्षण र संवद्र्धन गर्ने उद्देश्यले सरकारले उक्त विधेयक संशोधन गर्न लागेको बताउनुभयो। बीउबिजनसम्बन्धी ऐन संशोधन भएपछि बीउले फल नदिएमा किसानले सम्बन्धित कम्पनीबाट क्षतिपूर्ति पाउने उहाँले बताउनुभयो।
दुई विधेयक दफावार छलफलका लागि समितिमा
प्रतिनिधिसभा बैठकले ‘सामाजिक सुरक्षा (पहिलो संशोधन) विधेयक, २०७९’ र ‘तेजाब तथा अन्य घातक रासायनिक पदार्थ (नियमन) विधेयक, २०७९’ दफावार छलफलका लागि समितिमा पठाएको छ ।
आठ लाख डलर ठगी आरोपमा पक्राउ
प्रहरीले लाख डलर ठगी गरेको आरोपमा एक जनालाई पक्राउ गरेको छ । पक्राउ पर्नेमा सिन्धुपाल्चोकको बाह्रबीसे नगरपालिका–६ घर भइ हाल काठमाडौंको नागार्जुन–९ स्युचाटार बस्ने ३३ वर्षीय कुमार श्रेष्ठ रहेका छन् ।
निरुका दुई कृति सार्वजनिक
काभ्रेपलाञ्चोकको पनौतीका स्रस्टा निरु न्यौपानेको दुई कृति र एउटा गीत लोकार्पण गरिएको छ ।
नयाँ औषधि दर्ता एवम् गुणस्तर यकिनका लागि ५८ विदेशी कम्पनी छनौट
औषधि व्यवस्था विभागले नयाँ औषधि दर्ता एवम् गुणस्तर यकिनका लागि ५८ वटा विदेशी कम्पनी छनौट गरेको छ ।
