पहिरोका कारण ६३ घरपरिवार विस्थापित

काभ्रे समाचारदाता

काभ्रे, साउन २४ गते । अविरल वर्षाका कारण जिल्लाको भुम्लू गाउँपालिका–१ सापिङका ६३ घरपरिवार विस्थापित भएका छन् । दुई दिनको अविरल वर्षाका कारण पहिरो आउँदा ६३ परिवार विस्थापित भएको जिल्ला प्रहरी कार्यालय काभ्रेले जनाएको छ ।
जिल्ला प्रहरी कार्यालय काभ्रेका प्रमुख  (एसपी) रविराज खड्काले भुम्लू गाउँपालिका–१ गैरीगाउँ, ढुङ्गाना टोल, देउराली दलित बस्ती, आल्डाँडा, डिडाँडा, भोर्लाटोल र तल्लो खोलाबारीका ६३ परिवार विस्थापित भएको बताउनुभयो । विस्थापित परिवारलाई नजिकको विद्यालयमा सार्न सुरु गरिएको खड्काले जानकारी दिनुभयो ।
उहाँका अनुसार गैरीगाउँका १६, ढुङ्गाना टोलका दुई, देउराली दलित बस्तीका नौ, आल्डाँडाका आठ, डिडाँडाका १९, भोर्लाटोलका दुई र तल्लो खोलाबारीका सात घरधुरी विस्थापित भएका छन् । विस्थापितमध्ये दलित बस्तीका नौ परिवारलाई सेतीदेवी माविमा सारिएको छ ।
गैरीगाउँका विस्थापितलाई जनहित प्रावि, आल्डाँडा, डिडाँडाका विस्थापितलाई सेतीदेवी मावि र तल्लो खोलाबारीका विस्थापितलाई गणेश माविमा सार्ने तयारी भएको छ । त्यस्तै चार परिवार आफन्तकहाँ बसेका छन् । पहिरोले चार घरमा क्षति पुगेको छ भने तीन बाख्रा पुरिएर मरेका छन् ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds