‘बोक्सीको घर’ को प्रदर्शन मिति घोषणा

काठमाडौँ, माघ २५ गते । चलचित्र ‘बोक्सीको घर’ को प्रदर्शन मिति घोषणा गरिएको छ । वैशाख १४ गतेबाट चलचित्र प्रदर्शनमा आउने भएको छ । अभिनेतृ केकी अधिकारी मुख्य भूमिकामा रहेको चलचित्र आठ वर्षअघि मञ्चन भएको नाटक ‘बोक्सीको घर’ मा आधारित छ ।  नाटककै लेखक एवं निर्देशक सुलक्षण भारतीले चलचित्रलाई निर्देशन गर्नुभएको छ ।

महिलालाई बोक्सीको आरोप लगाएर समाजले उनीहरूमाथि गर्ने शोषणको वरिपरि चलचित्रको कथा आधारित छ । चलचित्रमा केकीसँगै सुपला सापकोटा, स्वेच्छा राउत, सुलक्षण भारती, रमा थपलिया, सुषमा निरौला, सविन बाँस्तोलालगायतको अभिनय रहेको छ । 

चलचित्रमा मुख्य गरेर कुप्रथालाई चित्रण गरिएको नायिका अधिकारीले बताउनुभयो । अधिकारी स्वंय निर्माता रहनुभएको चलचित्रको कार्यकारी निर्माता राजकुमार घिमिरे हुनुहुन्छ ।