एलपीएल : घोडाघोडी र कैलाली विजयी

काठमाडौँ, मङ्सिर २० गते । कैलालीको धनगढीमा जारी लिटल फ्लावर प्रिमियर लिग (एलपीएल) मा बुधबार घोडाघोडी क्रिकेट एकेडेमी र कैलाली जिल्ला क्रिकेट क्लब विजयी भएका छन्। 

पहिलो खेलमा घोडाघोडी क्रिकेट एकेडेमीले लिटल फ्लावर स्कुललाई ४१ रनले हरायो । घोडाघोडीले दिएको १२८ रनको लक्ष्य पछ्याएको लिटल फ्लावरले १६.५ ओभरमा सबै विकेटको क्षतिमा ८६ रन बनायो । यसअघि टस जितेर पहिले ब्याटिङ गरेको घोडाघोडी क्रिकेट एकेडेमीले १९.५ ओभरमा सबै विकेटको क्षतिमा १२७ रन बनाएको थियो । 

यस्तै अर्को खेलमा कैलाली जिल्ला क्रिकेट क्लबले खप्तड इन्डोर स्पोर्ट्स ट्रेनिङ सेन्टरलाई ३४ रनले हरायो । कैलालीले दिएको १४० रनको लक्ष्य पछ्याएको खप्तडले १७.४ ओभरमा सबै विकेटको क्षतिमा १०५ रन बनाएको थियो ।

यसअघि टस जितेर ब्याटिङ गरेको कैलाली जिल्ला क्रिकेट क्लबले २० ओभरमा सात विकेटको क्षतिमा १३९ रन बनाएको थियो । आठौँ संस्करणको यस प्रतियोगितामा १६ टोलीको सहभागिता रहेको छ । प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपियाँ पुरस्कार पाउनेछन् ।