धर्बेन्द्र झा
जनकपुरधाम, मङसिर ६ गते । मधेश प्रदेश सभाको समानुपातिकतर्फ प्रदेश सभा सदस्यमा निर्वाचन आयोगद्वारा नियुक्त हुनु भएका जनता समाजवादी पार्टी (जसपा) का सन्जिलाकुमारी यादवले बुधबार पद तथा गोपनीयताको शपथ लिनुभएको छ ।
मधेश प्रदेश सभामा आज आयोजित एक कार्यक्रमबिच यादवलाई मधेश प्रदेश सभाका सभामुख रामचन्द्र मण्डलले पद तथा गोपनीयताको शपथ खुवाउनुभयो । यादव मैथली भाषामा शपथ लिएको सभामुख मण्डलका प्रेस संयोजक अवधेश कामतले जानकारी दिनुभयो ।
जसपाका प्रदेश सभा सदस्य बिन्दुकुमारी यादवको मृत्यु भएपश्चात् उहाँको स्थानमा जसपाले समानुपातिक तर्फ प्रदेशसभा सदस्यमा निर्वाचन आयोगलाई सन्जिलाको नाम सिफारिस गरेको थियो ।
शपथग्रहण कार्यक्रममा विभिन्न दलका नेता, प्रदेश सरकारका मन्त्री र प्रदेश सभा सदस्यहरूको उपस्थिति थियो । शपथग्रहण पछि सञ्चारकर्मीलाई प्रतिक्रिया दिँदै नव नियुक्त प्रदेशसभा सदस्य यादवले इमान्दारितापूर्वक आफूले आफ्नो जिम्मेवारी निर्वाह गर्ने प्रतिक्रिया दिनुभयो । नव नियुक्त प्रदेशसभा सदस्य यादव सिरहा निवासी हुनुहुन्छ ।
