जनार्जन खत्री
सर्लाही, कात्तिक ९ गते । सर्लाहीको ईश्वरपुर नगरपालिका २ भक्तिपुर मियाँखोरमा मोटरसाइकलले साइकललाई ठक्कर दिँदा एक जनाको मृत्यु भएको छ ।
दुर्घटनामा साइकल यात्रु सोही ठाउँका ५५ वर्षीय महलाजिम अन्सारीको मृत्यु भएको हो । गाउँको भित्री सडकमा मोटरसाइकलले ठक्कर दिँदा साइकलमा हिँडिरहनुभएका अन्सारीको घटनास्थलमै मृत्यु भएको इलाका प्रहरी कार्यालय केरशगञ्ज, बयलवासका प्रहरी निरीक्षक मानप्रसाद श्रेष्ठले जानकारी दिनुभयो ।
अन्सारीको शव प्रादेशिक अस्पताल मलङ्गवामा पोष्टमार्टमपछि बिहीबार परिवारले बुझेका छन् । दुर्घटनामा मोटरसाइकल चालक मियाँखोरकै २२ वर्षीय विवेक सहनी घाइते भएका छन् । चालकको प्रहरी निगरानीमा उपचार चलिरहेको प्रहरी निरीक्षक श्रेष्ठले बताउनुभयो ।
दुर्घटनामा संलग्न मोटरसाइकल इलाका प्रहरी कार्यालय केशरगञ्जको नियन्त्रणमा छ ।
