रवीन्द्र उप्रेती
बर्दिबास, कात्तिक २ गते । बडादशैंका अवसर पारेर बर्दिबास नगरपालिका –३ गौरीडाँडामा स्वास्थ्य शिविरको आयोजना गरिएको छ । ‘स्वस्थ जीवन सुरक्षित चाडपर्व’ को सन्देशसहित बुधवार आयोजित निःशुल्क शिविरमा सयजना बढी महिलाको स्वास्थ्य परीक्षण गरिएको छ ।
ग्रामीण भेगमा अझै स्वास्थ्य सेवाको पहुँच विस्तार हुन नसकेको अवस्थामा सर्वसाधारणले सहज उपचार पाउन् भन्ने उद्देश्यले घरदैलोमै स्वास्थ्य शिविर आयोजना गरिएको वडाध्यक्ष विराट विष्टले बताउनुभयो ।
नेपाल परिवार नियोजन सङ्घ बर्दिबास शाखासँगको सहकार्यमा बर्दिबास –३ ले आयोजना गरेको एक दिने शिविरमा महिला प्रजनन स्वास्थ्यसम्बन्धी सेवा प्रदान गरिएको थियो । बिहान ८ बजेदेखि अपरान्हसम्म सञ्चालित शिविरमा पाठेघरको मुखको क्यान्सर स्क्रिनिङ, यौनजन्य रोग, गर्भपतन तथा बाँझोपनजस्ता समस्याको परीक्षण र परामर्श, आङ खस्ने समस्याको उपचार, ईप्लान्ट, आइयुसीडी लगायतका परिवार नियोजनसम्वन्धि सेवा सञ्चालन गरिएको छ ।
स्वास्थ्य परीक्षणका क्रममा ३ जना महिलामा पाठेघरको मुखको क्यान्सरको लक्षण देखिएको, ३ जनामा आङ खस्ने समस्या पहिचान गरिएको र गर्भ परीक्षणका क्रममा एकजनालाई सुरक्षित गर्भपतन सेवा प्रदान गरिएको सेवाप्रदायक नेपाल परिवार नियोजन सङ्घका शाखा प्रबन्धक दीपेन्द्र श्रेष्ठले बताउनुभयो ।
परीक्षण गरिएका अधिकांश महिलामा सानातिना स्वास्थ्य समस्या पहिचान गरिएको उहाँले बताउनुभयो । संघका स्वास्थ्यकर्मीहरु क्षितिजा हमाल, प्रमिलाकुमारी यादव, शान्ता अधिकारी लगायतले सेवा प्रदान गर्नुभएको शिविरमा विभिन्न रोगका करिव दश हजार मूल्य बराबरका निःशुल्क औषधि वितरण गरिएको आयोजक वडा कार्यालयले जनाएको छ । चाडवाडको मुखमा घरदैलोमै पाएको निःशुल्क स्वास्थ्य सेवाप्रति वडाबासीले खुसी प्रकट गरेका छन् ।
