रजनी योगी
सुर्खेत, असोज १३ गते । कर्णाली प्रदेशका मुख्यमन्त्री राजकुमार शर्माले मानव अधिकार संरक्षणका लागि सरकार प्रतिबद्ध रहेको बताउनुभएको छ । मानव अधिकारको संरक्षण र संवर्धनमा पत्रकारिताको भूमिका विषयक दुई दिने तालिमको उद्घाटन गर्दै उहाँले सो कुरा बताउनुभएको हो ।
मुख्यमन्त्री शर्माले सरकारले आजदेखि भोलीसम्मको विषय हेरेर सरकारले मानव अधिकारको चिन्ता राख्ने बताउनुभयो । उहाँले शिक्षा, स्वास्थ्य, रोजगार, सुशासन र पूर्वाधारको नाराका साथ मानव अधिकारको रक्षामा लागिपरेको बताउनुभयो ।
मुख्यमन्त्री शर्माले गरिबीका कारण अधिकारको हनन् भएको बताउँदै त्यसलाई माथि उठाउने विषयलाई सरकारले नीति तथा कार्यक्रम अघि बढाउने प्रतिबद्धता जनाउनुभयो । उहाँले शिक्षा विकराल बन्दैगएको भन्दै दक्ष जनशक्ति उत्पादन गर्ने कारखाना कमजोर भएको बताउनुभयो ।
इन्सेकका अध्यक्ष डा. कुन्दन अर्यालले पत्रकारिता र मानवअधिकार एउटै डुङ्गाका यात्री रहेकाले सहकार्य गर्न जरुरी रहेको बताउनुभयो । उहाँले पछिल्लो समय सामाजिक सञ्जाल र प्रविधिले पत्रकारितालाई चुनौती थपिरहेको भन्दै पठनयोग्य सामग्री उत्पादन गरेमा त्यसको प्रभाव पर्ने बताउनुभयो ।
तागत भएका सामग्री ल्याउन पत्रकारलाई उहाँले अनुरोध गर्नुभयो । भ्रामक समाचारबाट बच्नुपर्ने, जनसरोकारका विषयमा खोज रिपोर्टिङ गरे पत्रकारिताको भविष्य राम्रो रहेको उहाँको भनाइ छ । ज्ञान, सीप र समय आवश्यक रहेको भन्दै पत्रकार अग्रपङ्क्ति मानव अधिकार रक्षक रहेकाले मिलेर सँगसँगै अघि बढ्नुपर्ने उहाँको भनाइ छ ।
