कोकिला भण्डारी
धनकुटा, भदौ ७ गते । अन्तर्राष्ट्रिय जगतमा सिफुड र तराईमा थारु समुदायको सांस्कृतिक खानपानको रुपमा पहिचान बनाएको परिकार घोङ्घी अब धनकुटामै व्यावसायिक उत्पादन सुरु भएको छ ।
धनकुटा नगरपालिका –१ का कृषि उद्यमी तेजबहादुर राईले श्री ओक्मालुङ एग्रो फर्म सञ्चालनमा ल्याई घोङ्गी उत्पादन सुरु गरेको हो । उहँले विगत २ वर्षदेखि घुँगीपालनको शुरुवात गर्नुभएको हो । दुई वर्षअघि तराईबाट ल्याएर पोखरीमा हालिएको ४ केजी घोङ्घीबाट उत्पादन सुरु भएको कृषि उद्यमी राईले बताउनुभयो ।
हाल नेपालमा खाना परिकारमा विविधता खोज्ने क्रम जारी रहेको र यस्तो परिकार खानाका लागि तराईमा थारुको परिवार वा होमस्टेमा पुग्नुपर्ने बाध्यतालाई दृष्टिगत गर्दै होमस्टेमा पुग्नुपर्ने बाध्यताको अन्त्यका लागि उत्पादन सुरु गरिएको उद्यमी तेजबहादुरको भनाइ छ । घोङ्गीको बजारीकरणमा समस्या नभएकाले व्यावसायिक रुपमै उत्पादन सुरु गरिएको उहाँको भनाइ छ ।
धनकुटामा अब चिसो हावापानीमा हुर्किएको घोङ्गी खान पाइने भएको छ । सुरुमा परीक्षणका लागि सुरु गरिएको व्यवसाय सफल भएपछि उद्यमी राईले व्यावसायिक रुप दिएको बताउनुभयो ।
घोङ्घी स्वस्थकर मात्रै नभएर यसबाट शरीरले क्याल्सियम र प्रोटिन प्रशस्त रुपमा प्राप्त हुने चिकित्सकको भनाइ छ । यसको व्यवसाय र व्यापार संसारभर अरबौं डलरमा हुनेगरेको व्यवसायी राईले बताउनुभयो ।
धार्मिक गुफा तथा जैविक विविधता बोकेको ओक्मालुङका पर्यटकलाई लक्षित गरी घोङ्गी पालनका साथ माछापालन, सुन्तला खेती, एभोकाडो खेती गरिएको उद्यमी राईले बताउनुभयो ।
समुद्र सतहबाट १ हजार ४ सय मिटरको उचाइमा रहेको यो क्षेत्र चैत–वैशाखको सुक्खा समयमा समेत हरियो रहने विशेषताले समेत मानवका लागि मनोरन्जन गर्ने थलोको रुपमा ठुलो सम्भावना बोकेको क्षेत्र हो । घोङ्घी पालन गरी आन्तरिक तथा बाह्य पर्यटकको मन जित्न सकिने विश्वास राईको छ ।
यहाँको घोङ्घी चिसो पानीमा हुर्केको हुनाले ढिलो बढ्ने, प्रजनन प्रक्रिया पनि तराईमा भन्दा ढिलो हुनेगरेको उहाँले बताउनुभयो । तराईको गर्मीमा भन्दा पहाडको चिसोमा पालन गरिएको घोङ्घी सफा र स्वादिलो हुने, चिसो हावापानीमा हुने जुनसुकै वस्तु पनि तातो ठाउँको भन्दा मिठो हुने राईले बताउनुभयो ।
घोङ्घी तराईका थारु समुदायले मात्र होइन, अहिले प्रायः सबै समुदायका मान्छेले खान थालेका होटलमा यसको माग बढेको राईले बताउनुभयो ।
घोङ्घी तराईका थारु समुदायले मात्र होइन, अहिले प्रायः सबै समुदायका मान्छेले खान थालेका होटलमा यसको माग बढेको राईले बताउनुभयो । माग बढेपछि उत्पादित घोङ्घी खपत गर्न कुनै समस्या नरहेको उहाँको भनाइ छ ।
स्थानीय जीवनप्रसाद राईका अनुसार यहाँ मानिसहरु आउने राम्रो वातावरण रहेकाले घोङ्घीको महत्व अझ बढेर जानेछ । अहिले एक ठाउँमा उत्पादन भइरहेको घोङ्घी अन्य व्यवसायीले पनि विस्तार गर्ने उहाँको बुझाइ छ ।
