छोरा ! अब भेदहरू जलाएर ब्युँझी ! (कविता)

भेदलाई निषेध गरिस्

राम्रै भयो

तर तेरो सद्भावमा भेद छ

तैपनि राम्रै छ !

तैँले पुनर्जन्म चाहन्छस् ?

चाहन्छस् भने –

साइत राम्रो गर

कुसाइतको जन्म राम्रो हुँदैन 

तेरो अहिलेको जन्म पूर्वजन्मको कुसाइत हो 

त्यसैले यस्तो फल भोगिरहेछस् !

तेरो चिन्तामा चित्त निदाएको छ

अतः तँलाई ब्युँझिन गाह्रो छ

आज बितेपछि भोलि

भोलि बितेपछि पर्सि

पर्सि बितेपछि निकोर्सि

यस्तो त निरन्तर भैरहन्छ 

किन्तु समयको यो निरन्तरतामा तँ ब्युँझिनस् भने

तेरो चित्त ब्युँझेन भने

तँ कहिल्यै ब्युँझिन्नस् 

जन्मौँजन्मतक निदाइरहन्छस् 

यसर्थ चिन्ता गर्न छाडिदे !

ऊ त्यो रुखलाई हेर 

त्यसको हाँगामा बसेको चरोलाई हेर

अनि तँलाई हेर

तीसँग तँलाई तुलना गर

तँ खिन्न भइस् भने

तिनीहरूभन्दा तँ भिन्न रहेछस् भने 

त्यही भिन्नता तेरो दुःखको कारण हो !

तेरो अनिद्राको सैतान हो !

अतः मन शुद्ध राख

तेरो संसार निद्रामा पनि जागृत हुन्छ 

सद्भाव विभेदमा रहन्छ

चिन्ता भेदका चितामा जल्नेछन् !