उत्साह र उमङ्ग
बोकेर आउनेहरूलाई
रोक्न नखोज ।
उर्वर मन–मस्तिष्क र भावना
हुनेहरूलाई
छेक्न नखोज
ऊर्जावान् कर्मठ
वाहकहरूलाई
निस्क्रिय पार्न नखोज ।
उत्साहलाई रोक्न खोजे
निरासाको बादल मडारिन सक्छ
उर्वरपनलाई छेक्न खोजे
सिर्जना ठप्प हुने छ
ऊर्जालाई निस्क्रिय पार्न खोजे
विनाश हुन सक्छ ।
सिर्जना विहीनता, निरासा र विनाशले
विकासका मार्गहरू
क्षत/विक्षत भएर भत्कने छन्
परिवर्तनमा बाधा पुग्ने छ
अग्रगमनको गतिमा
असर पर्ने छ
प्रतिगमन मौलाउने
अवसर पाउने छ ।
त्यसैले,
स्वतन्त्रत राष्ट्रको
समृद्ध मुहार र समुन्नत भविष्य हेर्न
उत्साह, उमङ्ग र ऊर्जा
बोकेर आउनेहरूलाई
स्वागत र सम्मान गर्न सक्नु पर्छ
ऊर्जा र उर्वरपनको
उपयोग गर्न सक्नु पर्छ ।
