राधा लुइटेल
फिदिम, साउन ९ गते । मेची राजमार्गको पाँचथर खण्डमा मङ्गलबार सवारी बोलेरो जिप (ट्याक्सी) दुर्घटना हुँदा निधन भएका यात्रुको पहिचान खुलेको छ ।
ज्यान गुमाउनेमा ताप्लेजुङ जिल्लाको मैयाखोला गाउँपालिका १ ढुङ्गेसाँघुका ४५ वर्षीय जितेन्द्रमणिविक्रम वनेम रहेको जिल्ला प्रहरी कार्यालय पाँचथरका सूचना अधिकारी दिवस कुँवरले जानकारी दिनुभयो ।
झापाको बिर्तामोडदेखि ताप्लेजुङ जाँदै गरेको मे १ ज १९४१ नम्बरको जिप दिउँसो एक बजे फिदिम नगरपालिका २ सामदिनमा दुर्घटनामा परेको थियो ।
दुर्घटनामा घाइते हुनुभएका ताप्लेजुङकी ४० वर्षीया सविना विश्वकर्मा र काठमाडौँ बल्खुकी मिना लिम्बूको अवस्था गम्भीर छ । उनीहरूसहित ८ जनालाई पाँचथर अस्पतालमा उपचार सम्भव नभएर झापातर्फ पठाइएको छ ।
अन्य ५ जनाको पाँचथर अस्पतालमै उपचार भइरहेको छ । गाडी सडकदेखि दुई सय मिटर तल खसेको छ । ओरालो बाटोमा ब्रेक नलागेर गाडी भीरतिर पसेको प्रारम्भिक अनुमान गरिएको प्रहरीले जनाएको छ ।
