लक्ष्मण पौडेल
भैरहवा, असार १४ गते । सिद्धार्थ बिजनेस ग्रुप अफ हस्पिटालिटी प्रालिले रुपन्देहीको भैरहवामा पाँचतारे होटल थपिएको छ । साढे दुई अर्ब लगानीमा निर्माण गरिएको सिद्धार्थ बिलासा होटलको सञ्चालन सुरु भएको छ । रुपन्देहीमा यो तेस्रो पाँचतारे होटल हो ।
यसअघि पाँचतारे होटलको रूपमा टाइगर पार्टी प्यालेस र पवन इन्टरनेशनल सञ्चालनमा छन् । सिद्धार्थ बिजनेस ग्रुपले २५ वर्षअघि कैलालीमा सामान्य खाजा पसल सञ्चालन गरेर व्यावसायिक यात्रा सुरु गरेको थियो । भैरहवा अञ्चलपुर प्रहरी चेकपोस्टदेखि दुई सय मिटर पश्चिमतिर मायादेवी गाउँपालिका वडा –८ मा पाँचतारे होटल निर्माण गरिएको छ ।
चार बिघा क्षेत्रफलमा फैलिएको होटलमा डिलक्स, एक्जुकेटिभ स्विट, स्विट र प्रेसिडेन्ट स्विटगरी चार स्तरमा वर्गीकरण गरिएका ८५ वटा कोठा छन् । समूहका प्रमुख कार्यकारी अधिकृत कृष्णप्रसाद न्यौपानेका अनुसार होटलमा लबी लाउन्ज, अल डे डाइनिङ, रूप टफ रेस्टुरेन्ट तथा स्विमिङ पुल, फिटनेस, स्पा, साउना, ज्याकुजीसहितको हेल्थ क्लब सेवा, गार्डेन, एउटा सानो र अर्को ठुलो सभा हल, तीन वटा कन्फरेन्स हल तथा क्यासिनो छ ।
न्यौपानेका अनुसार होटलको पूर्ण सञ्चालनपछि तीन सय जनाभन्दा बढीले रोजगारी पाउने छन् । सुरुमा दुई वर्षमै निर्माण सक्ने र एक अर्ब रुपियाँ बढी लागत अनुमान थियो । कोरोना महामारीका कारण योजनाअनुसार काम भएन । ढिलाइ, निर्माण सामग्रीको मूल्यवृद्धि तथा पूर्वाधार पनि थपिँदै जाँदा लागत बढेको न्यौपानेले बताउनुभयो ।
ग्रुपका अध्यक्ष चिन्तामणि (लक्ष्मण) न्यौपानेले सिद्धार्थ होटल तथा रिसोर्टको नाममा भैरहवासँगै, चितवनको सौराहा, दाङको लमही र विराटनगरमा पाँचतारेदेखि लक्जरी रिसोर्टसम्म सञ्चालन सुरु गरिसकिएको जानकारी दिनुभयो । भैरहवाको डिलक्स पाँचतारे होटल ग्रुपकै ‘ड्रिम प्रोजेक्ट’ का रूपमा रहेको उहाँको भनाइ छ । दाङको लमहीमा पनि चारतारे होटल सञ्चालनमा आइसकेको उहाँले बताउनुभयो ।
भैरहवाको पाँचतारे होटलमा समूहको आफ्नै लगानी छ । चार वटा होटल र रिसोर्ट थपिएपछि सिद्धार्थ समूहका होटल, रिसोर्ट र क्याफेको सङ्ख्या ३० पुग्नेछ । होटल मात्र १९ वटा हुने छन् ।
समूहले हस्पिटालिटी क्षेत्रको २५ वर्षे व्यावसायिक यात्रामा पाँचतारे होटल भने पहिलो पटक सञ्चालन गरेको हो । बाह्य पर्यटकलक्षित तीनतारे र चारतारे होटल भने यसअघिदेखि नै सञ्चालन गरिरहेको छ । कटेज तथा रेस्टुरेन्ट व्यवसायबाट यात्रा विस्तार गरेको समूहले बुटवलमा सिद्धार्थ कटेज तथा रेस्टुरेन्ट सञ्चालन गरिरहेको छ । समूहले हस्पिटालिटीसँगै विभिन्न सेवा तथा उत्पादनको क्षेत्रमा पनि लगानी गरिरहेको छ ।
‘ट्रेडिङतर्फ सिद्धार्थ हस्पिटालिटी मार्ट र आइटीतर्फ सर्व टेक्नोलोजी, कृषि उत्पादनतर्फ बायोटिका, इन्स्टिच्युटतर्फ सिद्धार्थ इन्स्टिच्युट अफ हस्पिटालिटी ब्रान्ड नाममा सेवा प्रवाह तथा वस्तु उत्पादन गर्दैआएका छौँ’ अध्यक्ष न्यौपानेले भन्नुभयो ।
