अझ जिम्मेवार भएर अगाडि बढ्न आवश्यक : मुख्यमन्त्री शाह

अविनाश चौधरी
धनगढी, जेठ ३० गते । सुदूरपश्चिम प्रदेशका मुख्यमन्त्री कमलबहादुर शाहले सङ्घीयताप्रति जनताको भरोसा जगाउन प्रदेश र स्थानीय सरकारले अझ बढी जिम्मेवार भएर काम गर्न आवश्यक रहेको बताउनुभएको छ ।

धनगढी उपमहानगरपालिकाले कार्यालय परिसरमा निर्माण गरेको सेवाग्राही प्रतीक्षालयको मङ्गलबार उद्घाटन गर्नुहुँदै मुख्यमन्त्री शाहले यस्तो बताउनु भएको हो । शाहले सङ्घीयताप्रति जनताको विश्वास बढाउन आवश्यक रहेको औँल्याउनुभयो ।

हरेक विकासको कार्यमा प्रदेश र स्थानीय सरकारसँगै अगाडि बढ्ने वातावरण निर्माण गर्ने कार्य प्रदेश सरकारले गरिरहेको मुख्यमन्त्रीको भनाइ थियो । “त्यसैले, हामी प्रदेश सरकार र स्थानीय सरकारको भूमिकाप्रति पनि सचेत छौँ,” उहाँले भन्नुभयो ।

जनताको पहिलो पहुँचको सरकार स्थानीय तह रहेकाले स्थानीय तह जिम्मेवार हुनुपर्ने मुख्यमन्त्री शाहले जोड दिनुभयो । उहाँले जनप्रतिनिधि र कर्मचारी सहयात्री रहेको उल्लेख गर्नुहुँदै पारदर्शी, नैतिकवान्, जिम्मेवार भएर काम गर्न आग्रह गर्नुभयो । उहाँले भन्नुभयो, “हामी सबै जना मिलेर जनतालाई विश्वास दिलाउन सक्छौँ भने सङ्घीयता बलियो हुन्छ र यसप्रति जनताको भरोसा बढ्छ ।”

प्रविधिमैत्री सेवाग्राही प्रतीक्षालय निर्माण गरेर धनगढी उपमहानगरपालिकाले प्रशंसनीय कार्य गरेको भन्दै मुख्यमन्त्रीले खुसी व्यक्त गर्नुभयो । उहाँले धनगढी उपमहानगरपालिकाले सूचनाको हक सहज रूपमा प्रदान गरिरहेको बताउनुभयो ।

धनगढी उपमहानगरपालिकाका लागि सेवाग्राही सर्वोपरि रहेकाले उनीहरूको सम्मानका लागि सेवाग्राही प्रतीक्षालय निर्माण गरेको धनगढी उपमहानगरपालिकाका प्रमुख गोपाल हमालले बताउनुभयो । यसको निर्माणले सेवाग्राहीलाई आत्मसम्मान मिल्ने उहाँको भनाइ थियो । “हिजोको दिन सेवाग्राहीहरू रुखमुनि बस्दथे ।,” उहाँले भन्नुभयो, “तर उनीहरू नै सर्वोपरि रहेकाले सम्मानका लागि धनगढी उपमहानगरपालिकाले आफ्नै खर्चमा सेवाग्राही प्रतीक्षालय स्थापना गरेको हो ।”

विभिन्न सुविधासहितको सेवाग्राही प्रतीक्षा निर्माणले अब सेवाग्राहीहरूलाई सहज हुनेछ । विभिन्न समस्या लिएर आएका सेवाग्राहीहरूलाई अब प्रमुख, उपप्रमुख वा प्रमुख प्रशासकीय अधिकृतले त्यही गएर भेट्ने र उनीहरूको गुनासो सम्बोधन गर्ने प्रमुख हमालले बताउनुभयो । “अब गुनासो लिएर आएकाहरू प्रमुख, उपमुखको कार्यकक्षमै पुग्नु पर्दैन ।,” उहाँले भन्नुभयो, “सेवाग्राही बसेको प्रतीक्षालयमा स्वयम् प्रमुख, उपप्रमुख वा प्रमुख प्रशासकीय अधिकृत उनीहरू सामु पुग्नेछौँ ।”

नगरप्रमुख हमालले धनगढी उपमहानगरपालिकालाई अरूले हेर्न आउने गरी बनाउन खोजिरहेको भन्दै त्यसमा प्रदेश सरकारको साथ र सहयोग चाहेको बताउनुभयो । उहाँले साझेदारीमा काम गर्न मुख्यमन्त्रीलाई आग्रह गर्नुभयो ।

धनगढी उपमहानगरपालिकाले २८ लाख ९१ हजार रुपियाँ लगानीमा सेवाग्राही प्रतीक्षालय निर्माण गरेको हो । जुन घर भूकम्प प्रतिरोधी र अपाङ्गतामैत्री रहेको उपप्रमुख कन्दकला रानाले जानकारी दिनुभयो । प्रतीक्षालय निर्माणले सेवाग्राहीलाई सहज हुने उहाँको भनाइ थियो । सो प्रतीक्षालयमा फ्री वाईफाई, टेलिभिजन, चिसो खानेपानी लगायतको व्यवस्था गरिएको छ ।