काठमाडौं, वैशाख २७ गते। उपप्रधान तथा गृहमन्त्री नारायणकाजी श्रेष्ठले सरकार सुशासन स्थापित गर्ने, समृद्धिको लक्ष्य हासिल गर्ने र सामाजिक न्याय स्थापित गर्नेमा प्रतिबद्ध रहेको बताउनुभएको छ।
सिंहदरबारमा बुधबार सञ्चारकर्मीसँग कुरा गर्नुहुँदै उहाँले सरकार बनेदेखि यो विषयमा स्पष्ट रहेको बताउनुभयो। गृहमन्त्री श्रेष्ठले भन्नुभयो, “हामीले सरकार बनेदेखि नै स्पष्ट भनेका छौं, हाम्रो सरकार सुशासन स्थापित गर्ने, समृद्धिको लक्ष्य हासिल गर्ने र सामाजिक न्याय स्थापित गर्नेमा प्रतिबद्ध छ। सुशासन र भ्रष्टाचारको प्रभावकारी नियन्त्रण बिना समृद्धिको लक्ष्य हासिल गर्न सकिँदैन।”
उहाँले थप भन्नुभयो, “समृद्धिको पूर्वशर्त सुशासन हो भन्ने हाम्रो दृढ मान्यता हो। यसै आधारमा हामीले काम गर्दै गएका छौं। अहिले नक्कली भुटानी शरणार्थी बनाएर विदेश पठाउने र यसको सन्दर्भमा आर्थिक रुपमा विभिन्न ढङ्गले ठगीको प्रक्रियाको सन्दर्भमा हामीले अनुसन्धानको प्रक्रिया अगाडि बढाएका छौं। अनुसन्धानले माग गर्ने हदसम्म, आधार तयार गर्ने हदसम्म विभिन्न व्यक्ति थप अनुसन्धानका लागि तानिनुभएको छ।”
शीर्ष नेतासँगको भेटबारेको जिज्ञासामा उहाँले नेतासँग आफ्नो भेट तथा छलफल नभएको बताउनुभयो। तर नेकपा (एमाले) अध्यक्ष केपी शर्मा ओलीसँग केही दिन अघि भएको टेलिफोन वार्ता अनुरुप ओली निवासमा भेट हुँदा अहिलेको विषय सामान्य भ्रष्टाचारको केश मात्र नभई राष्ट्रको अपमान गर्ने, स्वाभिमान गिराउने कुकर्म भएको निष्कर्श निस्केको उहाँको भनाइ छ।
“यो सामान्य भ्रष्टाचारको केश मात्रै होइन, यो राष्ट्रको अपमान गर्ने, राष्ट्रको स्वाभिमान गिराउने कुकर्म पनि हो। त्यसकारणले यसको अनुसन्धानको प्रक्रिया अगाडि बढाउनुपर्छ र यसमा जोसुकै भए पनि कारबाही गर्नुपर्छ भनेर सहमति भयो। मैले त्यसमा सहयोगको माग गरेँ, आँड, भरोसा माग गरेँ। म पुरै सहयोग गर्छु निर्दोष नफस्नेगरी, दोषीलाई नछोड्नेगरी अगाडि बढ्नुस् भन्नुभयो”, गृहमन्त्री श्रेष्ठले भन्नुभयो।
यो विषयमा मंगलबारको बालुवाटार शीर्ष नेताका बीच छलफल भएको उहाँले जानकारी दिनुभयो। “निर्दोष फस्दैन, फसाउन हुँदैन। कुनै स्वार्थको आधारमा काम हुँदैन। अनुसन्धानमा ‘स्ट्याण्डिङ अर्डर दिएको छु। प्रहरी निष्पक्ष अनुसन्धानको क्रममा लागेको छ, जो अनुसन्धानको क्रममा देखाउँछ, उनीहरुलाई प्रहरीले छोड्दैन”, उहाँले भन्नुभयो।
