दैलेख समाचारदाता
दैलेख, वैशाख १७ गते । महाबु गाउँपालिका –३, बासीस्थित भगवती आधारभूत विद्यालयको चारकोठे भवन एक वर्षदेखि अलपत्र छ। ठेकेदारले आधा काम गरी १६ लाख रकम लिएर भागेपछि विद्यालय भवन निर्माण अलपत्र परेको हो। कर्णाली प्रदेश सरकार सामाजिक विकास मन्त्रालयबाट आर्थिक वर्ष ०७८/७९ मा चारकोठे भवन निर्माणका लागि पुस महिनामा सम्झौता भएको थियो।
विद्यालयकै प्रधानाध्यापक र विद्यालय व्यवस्थापन समितिको लापरबाहीका कारण विद्यालय भवन अलपत्र परेको स्थानीयले बताएका छन्। विद्यालय व्यवस्थापन समितिले स्थानीय ठेकेदारलाई भवन निर्माणको जिम्मा दिएको थियो। सामाजिक विकास कार्यालय दैलेखका कार्यालय प्रमुख भीमप्रसाद पोखरेलले गत आर्थिक वर्षमा चारकोठे विद्यालय भवन निर्माणका लागि बजेट विनियोजन भएको र त्यसैअनुसार विद्यालयलाई १६ लाख पेस्की दिएको जानकारी दिनुभयो।
उहाँले विद्यालय भवन निर्माणका लागि पेस्की दिएको भए पनि विद्यालयले पेस्की फर्स्योट नगरी भवन अलपत्र पारेको बताउनुभयो। उहाँले विद्यालयलाई पेस्की रकम फर्स्योट र विद्यालयको भवन निर्माण गर्न ताकेता गरिएको बताउनुभयो। भगवती आधारभूत विद्यालयका शिक्षक अभिभावक सङ्घका अध्यक्ष विष्णुसिंह मल्लले विद्यालय व्यवस्थापन समिति र प्रधानाध्यापकको लापरबाहीका कारण विद्यालय भवन अलपत्र परेको दाबी गर्नुभयो। उहाँले अभिभावकलाई जानकारी नदिएर प्रधानाध्यापक र विद्यालय व्यवस्थापन समितिका अध्यक्षले ठेकेदारलाई काम गर्न लगाएको र ठेकेदारले पेस्कीबापत दिएको १६ लाख रुपियाँ लिएर काम अलपत्र पारेको आरोप लगाउनुभयो। उहाँका अनुसार १६ लाख बराबरको काम पनि भएको छैन। डीपीसी गरेर पिल्लर उठाएर सेटिङको सामान जोडेर अलपत्र पारिएको छ।
भगवती आधारभूत विद्यालय व्यवस्थापन समितिका अध्यक्ष झलक भण्डारीले ठेकेदारलाई विश्वास गरेर १६ लाख भुक्तानी गरिएको बताउनुभयो। उहाँले भन्नुभयो, “स्थानीयलाई कामको जिम्मा दिएका हौँ, काम नगरेपछि ताकेता गरेका छौँ। बाँकी फ्रिज भएको रकम मागका लागि सामाजिक विकास मन्त्रालयसँग माग गर्ने योजनामा छौँ।”
