प्रिय, तिमी रिसाएको?
मैले पूर्ववाचाहरु पुरा गरिनँ भनेर
तिमी रिसाएको ?
मलाई लागेको थियो
तिमी
ती वाचाहरू बिर्सने छौ
मैले बिर्सिए सरह,
तर, तिमीले त साँच्चिकै मनमा साँचेका रहेछौ,
त्यसको विपरीत मैले बेवास्ता गर्दै रहेँ
बिर्सिएको अभिनय गरिरहेँ ।
फेरि, तिमी नै भन न,
कुन सम्झौतालाई कुन साईतमा सम्झिउँ म
खातका खात
चाङ्का चाङ् छन्
कुन सम्झौतालाई
कुन हदसम्म सम्झिउँ म
निम्ता दिएर घर बोलाएर होस् या
म आफै तिम्रो घर आएर
कहिले चकलेट दिएर
कहिले केक दिएर
कहिले मानपदवीले सम्मान गरेर
तिम्रा मागहरू पुरा गरौँला भनेर
सम्झौता नगरेको होइन
सम्झौतामा दस्तखत गर्दैगर्दा
मेरो मनभित्रको चोर देखेनौ, चिनिनौ र त
अहिलेसम्म तिमी मेरो जालमा छौ ।
यी सम्झौताकै आधारमा त तिमी मेरो छौ
तर यसलाई चटक्क बिर्सिएर या भनौँ नबुझेर हो
बेलाबेला रिसानी गर्छौ, ममाथि आरोप लगाउँछौ ।
ल, भैगो,
हिजोसम्म जे भयो भयो
आउ, आज अर्को सम्झौता गरौँ ।।
सारा पूर्वसम्झौताहरु अक्षरसः लागु हुने
अर्को सम्झौता गरौँ
कथम्, यो लागु भएन र तिमी रिसायौ भने
पुनः अर्को सम्झौता गरौंला
त्यसलाई स्वर्णिम अक्षरमा लेख्ने वाचा गरौंला
आउ, सम्झौताका खातहरु लागु गरौँ भन्ने
अर्को सम्झौता गरौँ
र ति खातहरुका माथि फेरी अर्को एउटा थपौँ
र विश्वलाई देखाऔकक हाम्रो अमर प्रेम र भ्रातृत्व ।
उडब्रिज, भर्जिनिया
