अमरराज नहर्की
तनहुँ, वैशाख ६ गते । पाँच दलीय गठबन्धनका शीर्ष नेता आज (बुधबार) तनहुँ आउनु हुने भएको छ । प्रधानमन्त्रीसहित शीर्ष नेता तनहुँ –१ को उपनिर्वाचनका लागि बन्दीपुर गाउँपालिका –४ डुम्रे बजारमा चुनावी सभालाई सम्बोधन गर्न आउनु हुने भएको हो ।
गठबन्धनका तर्फबाट नेपाली कांग्रेसका केन्द्रीय सदस्य गोविन्द भट्टराई उम्मेदवार रहेको उक्त क्षेत्रमा सभा गर्न लागिएको नेपाली कांग्रेस तनहुँका प्रवक्ता हरि वाग्लेले जानकारी दिनुभयो ।
चुनावी सभामा नेकपा (माओवादी केन्द्र) का अध्यक्ष एवम् प्रधानमन्त्री पुष्पकमल दाहाल ‘प्रचण्ड’, कांग्रेसका सभापति शेरबहादुर देउवा, नेकपा (एकीकृत समाजवादी)का अध्यक्ष माधवकुमार नेपाल, कांग्रेसका महामन्त्रीद्वय गगनकुमार थापा र विश्वप्रकाश शर्मालगायत गठबन्धन दलका शीर्ष नेताले सभालाई सम्बोधन गर्नुहुने कार्यक्रम रहेको छ ।
यसैगरी, पाँच दलीय गठबन्धनले वैशाख ७ गते आँबुखैरेनी बजारमा सभा गर्ने कार्यक्रम तय भएको प्रवक्ता वाग्लेले जानकारी दिनुभयो ।
