स्याङ्जाको फेदी खोलामा पुरुष भलिबल हुने

काठमाडौं, चैत ६ गते । चैतको दोस्रो सात स्याङ्जाको फेदी खोलामा जिल्ला स्तरीय पुरुष भलिबल प्रतियोगिता हुने भएको छ । हिमशिखर क्लबको आयोजनामा चैतको १३ देखि १६ गतेसम्म जिल्ला स्तरीय पुरुष भलिबल आयोजना हुन लागेको हो ।

क्लबले हरेक वर्ष आयोजना गर्दै आइरहेको चैते दशैं मेलाको अवसरमा उक्त प्रतियोगिताको आयोजना गर्न लागेको हो । प्रतियोगितामा प्रथम हुने टोलीले एक लाख ११ हजार एक सय ११ र दोस्रो हुने टोलीले ७१ हजार एक सय ११ रुपियाँ पुरस्कार पाउनेछन् । 

प्रतियोगितामा सहभागी हुनका लागि ५ हजार रुपियाँ प्रवेश शुल्क तिर्नुपर्ने छ । प्रतियोगिताको दौरान ४० वर्ष भन्दामाथिका खेलाडीहरूको भेट्रान्स खेल समेत हुने छ ।

भेट्रान्सतर्फ प्रथम हुने टोलीले लोकल खसी पुरस्कार प्राप्त गर्ने आयोजक क्लबका कोषाध्यक्ष कृष्णबहादुर गुरुङले जानकारी दिनुभयो । प्रतियोगितामा २० भन्दा बढी टोलीको सहभागिता रहने आयोजकले जनाएको छ । 

प्रतियोगिता सम्पन्न गर्न १० लाख रुपियाँ खर्च हुने अनुमान गरिएको छ । वि.सं २०५० सालमा स्थापना भएको हिमशिखर क्लबले नियमित रूपमा यस्ता खेलकुद कार्यक्रमको आयोजना गर्दै आइरहेको छ ।