लक्ष्मण पौडेल
भैरहवा, चैत ६ गते । रुपन्देहीमा स्वतन्त्र विद्यार्थी युनियनको चुनाव भएका ६ वटा क्याम्पसमध्ये अनेरास्ववियु र नेविसङ्घले बराबरी सङ्ख्यामा जितेका छन् । १२ क्याम्पसमा स्ववियु निर्वाचनको लागि सङ्गठन दर्ता भए पनि ६ वटामा सङ्गठनहरुबीचको विवादका कारण रोकिएको छ ।
नतिजा सार्वजनिक भएका क्याम्पसमध्ये बुटवल बहुमुखी क्याम्पस, देवदह आदर्श क्याम्पस र हरैया बहुमुखी क्याम्पसमा एमाले निकट अनेरास्ववियुका उम्मेदवार विजयी भएका छन् भने सियारी ४ छपियास्थित लीलाधर घिमिरे छपिया जनता कलेज, सैनामैनाको रामापुरस्थित शहीद नारायण पोखरेल क्याम्पस र शुद्धोधनको फर्साटिकरस्थित यज्ञोदय दूधनाथ थारु क्याम्पसमा नेविसङ्घका उम्मेदवार विजयी भएका हुन् ।
यस क्षेत्रको पुरानो र धेरै विद्यार्थी भएको बुटवल बहुमुखी क्याम्पसमा अनेरास्ववियुका दुर्गाबहादुर एमसी निर्वाचित हुनुभएको छ । उहाँले अखिल क्रान्तिकारीका शिवबहादुर खवासलाई पराजित गर्नुभएको हो । यहाँ अनेरास्ववियुलाई छैटौँले साथ दिएको थियो । अन्य ६ वटा सङ्गठन एकल लडेका थिए ।
त्यसैगरी, देवदह आदर्श बहुमुखी क्याम्पसमा अनेरास्ववियुको प्यानल विजयी भएको छ । कञ्चन गाउँपालिकामा रहेको हरैया बहुमुखी क्याम्पसमा अनेरास्ववियुका प्रदिप शर्मा विजयी हुनुभएको छ । हरैया क्याम्पसमा अनेरास्ववियु, जनमत विद्यार्थी सङ्घ र लोकतान्त्रिक विद्यार्थी सङ्घको संयुक्त प्यानल बनेको थियो ।
सियारी गाउँपालिकाको लीलाधर घिमिरे छपिया जनता कलेजको स्ववियु अध्यक्षमा नेपाल विद्यार्थी सङ्घका अभिषेककुमार यादव विजयी हुनुभएको छ । फर्साटिकरको यज्ञोदय दूधनाथ क्याम्पसमा महेश चौधरी विजयी हुनुभएको छ । त्यसैगरी शहीद नारायण पोखरेल रामापुर क्याम्पसमा नेविसङ्घकै मनोज बेलबासे विजयी हुनुभएको छ । यहाँ नेविसङ्घले अखिल क्रान्तिकारी, अखिल विप्लव र अखिल समाजवादीसँग मिलेर चुनाव लडेको थियो ।
अब निर्वाचन हुन बाँकी रहेका ६ वटा क्याम्पसमध्ये भैरहवा बहुमुखी क्याम्पस र पक्लिहवा कृषि क्याम्पसमा ८ गते मिति तोकिएको छ भने लुम्बिनी वाणिज्य क्याम्पस, राममणि क्याम्पस, सिद्धार्थ गौतमबुद्ध क्याम्पसमा निर्वाचनको मिति टुङ्गो लागेको छैन ।
