सर्लाही समाचारदाता
सर्लाही, चैत १ गते । सर्लाहीमा केही दिनदेखि सर्पदंशका बिरामी ह्वात्तै बढ्न थालेका छन्। प्रादेशिक अस्पताल मलङ्गवा र सर्पदंश उपचार केन्द्र नवलपुरमा सर्पले डसेर उपचार गर्न आउने बिरामीको सङ्ख्यामा उल्लेख्य वृद्धि हुन थालेको छ। मलङ्गवा र नवलपुर दुवै स्थानमा अहिले दैनिक आठ/नौ जनासम्म सर्पदंशका बिरामी उपचारका लागि आइरहेका छन्।
प्रादेशिक अस्पताल मलङ्वाका प्रमुख डा. नवलकिशोर झाले गर्मी बढेपछि सर्पदंशका बिरामी बढ्न थालेका बताउनुभयो। गर्मी बढ्न थालेपछि विषालु सर्प अत्यधिक देखा पर्ने गरेका छन्। नवलपुर सर्पदंश उपचार केन्द्रका अध्यक्ष उद्धव पौडेलले करेत, गोमन, हरियोलगायत विषालु सर्पले टोकेर उपचार गर्न आउने बिरामी दिनहुँ बढिरहेका बताउनुभयो। सर्पले डस्ने बित्तिकै ल्याइएका बिरामीलाई एन्टिस्नेक भेनम चलाएर उपचार गर्दै आइरहेको भए पनि गम्भीर अवस्थामा ल्याइएका बिरामीको उपचारका लागि भने समस्या भइरहेको पौडेलले बताउनुभयो।
नवलपुर सर्पदंश उपचार केन्द्रमा आईसीयू र भेन्टिलेटर भए पनि चलाउन जान्ने जनशक्ति नहुँदा त्यसै थन्काएर राख्नुपरेको छ। त्यस्तै मलङ्गवास्थित प्रादेशिक अस्पतालमा रहेको आईसीयू र भेन्टिलेटर पनि प्रयोगविहीन अवस्थामा रहेको छ।
