सभामुख घिमिरे बहराइन प्रस्थान

काठमाडौं, फागुन २६ गते।  प्रतिनिधि सभाका सभामुख देवराज घिमिरे बहराइन प्रस्थान गर्नुभएको छ। शुक्रबार साँझ सभामुख घिमिरे नेपाली प्रतिनिधि मण्डलको नेतृत्व गर्दै फ्लाई दुबईको जहाजमा त्रिभुवन अन्तर्राष्ट्रिय विमास्थलबाट दुबई हुँदै बहराइन प्रस्थान गर्नुभएको हो। 

सभामुखको प्रतिनिधि मण्डलमा प्रतिनिधि सभाका सदस्य रमेश लेखक, हितराज पाण्डे र सन्तोष परियार, राष्ट्रिय सभाका सदस्य इन्दु कडरिया, संघीय संसदका महासचिव डा. भरतराज गौतम, प्रतिनिधि सभाका सचिव गोपालनाथ योगीसँगै सभामुखका प्रमुख स्वकीय सचिव तेजप्रकाश भट्टराई र संघीय संसद सचिवालयका शाखा अधिकृत राजन घिमिरे सहभागी हुनुहुन्छ।

फागुन २७ देखि चैत २ गतेसम्म आयोजना हुने अन्तर व्यवस्थापिका सङ्घको १४६ औं बैठकमा भाग लिन सभामुख घिमिरे बहराइन प्रस्थान गर्नुभएको हो। सभामुखमा निर्वाचित भएपछि उहाँको यो पहिलो विदेश भ्रमण हो।