नमराज सुवेदी
नुवाकोट, फागुन ११ गते । नुवाकोटको विदुर नगरपालिका वडा नम्बर ५ माझिटारमा मोटरसाइकल दुर्घटना हुँदा एक जनाको मृत्यु भएको छ । मृत्यु हुनेमा विदुर नगरपालिका वडा नम्बर ११ गेर्खुका विष्णु प्याकुरेल रहेको जिल्ला प्रहरी कार्यालय नुवाकोटले जनाएको छ ।
पिपलटारबाट बट्टारतर्फ जाँदै गरेको बा.प्र.०२–०२२ प २७७२ नम्बरको मोटरसाइकल आफैँ अनियन्त्रित भई सडक छेउको कलबोटमा ठोक्किँदा प्याकुरेल गम्भीर घाइते भएका थिए ।
उपचारको क्रममा त्रिशूली अस्पतालमा प्याकुरेलकाे मृत्यु भएको प्रहरीले जनाएको छ । दुर्घटनामा मोटरसाइकल पछाडि बसेका अस्थायी प्रहरी चौकी विदुरमा कार्यरत प्रहरी जवान भीमप्रसाद महत घाइते भएका छन् ।
उहाँको टाउको र दाहिने हातमा गम्भीर चोट लागेको छ । उहाँलाई सामान्य उपचारपछि काठमाडाैँ पठाइएको छ । घटनाको विषयमा अनुसन्धान भइरहेको प्रहरीले जनाएको छ ।
