दिवाकर पोख्रेल
देउखुरी, माघ २९ गते । लुम्बिनी प्रदेशमा नवनियुक्त मन्त्रीले आइतबार पद तथा गोपनीयताको शपथ लिनुभएको छ । प्रदेश प्रमुख अमिक शेरचनले नवनियक्त मन्त्रीलाई शपथ गराउनुभएको हो ।
आइतबार १ बजेका लागि शपथ ग्रहणको कार्यक्रम तय भएको भए पनि हावाहुरीले प्रदेशसभा परिसरमा टाँगिएकाे त्रिपाल उडाएपछि केहीबेर ढिलाे भएको थियो । समारोहमा आर्थिक मामिलामन्त्री जोखबहादुर महरा, भौतिक पूर्वाधार विकासमन्त्री इन्द्रजित थारु, स्वास्थ्यमन्त्री विष्णुप्रसाद पन्थी, वन तथा वातावरणमन्त्री दुर्गाप्रसाद चौधरी, उद्योग पर्यटन तथा यातायात व्यवस्थामन्त्री जानकीप्रसाद यादव, कृषि तथा भूमि व्यवस्थामन्त्री तुलसीराम शर्मा र सामाजिक विकासमन्त्री चन्द्रकेश गुप्ताले शपथ लिनुभएको हो ।
लुम्बिनीमा ठीक एक महिनापछि मन्त्रिपरिषद्लाई पूर्णता दिइएको पाएको छ । गत पुस २८ मा शपथ लिएका मुख्यमन्त्री लीला गिरीले माघ २८ मा मन्त्रिपरिषद्लाई पूर्णता दिनुभएको हो ।
यसअघि विना विभागीय रहेका दुई जना मन्त्रीलाई समेत जिम्मेवारी तोकिएको छ । एमालेबाट मुख्यमन्त्रीसहित पाँच, माओवादीबाट ३ र अन्य साना दलबाट एक–एक जनागरी १० जनाको मन्त्रिमण्डल विस्तार गरिएको हो । सत्ता साझेदार दलको बैठकले मन्त्रालय टुङ्गो लागेसँगै मन्त्रीहरुको नाम दलको बैठकबाट निर्णय गरिएको थियो ।
माओवादी संसदीय दलका नेता जोखबहादुर महरा, भौतिक पूर्वाधार विकासमन्त्री इन्द्रजीत थारु र आन्तरिक मामिला, कानुन तथा सञ्चारमन्त्री कृष्णा केसीलाई नियुक्त हनुभएको थियो । यसअघि केसीले विना विभागीय मन्त्रीको रूपमा शपथ लिनुभएको थियो ।
एमालेबाट विष्णु पन्थी स्वास्थ्यमन्त्री, दुर्गाप्रसाद चौधरी वन तथा वातावरणमन्त्री, तुलसीराम शर्मा कृषि तथा भूमि व्यवस्थामन्त्री नियुक्त भएका छन् । यसअघि मन्त्री बनेका एमालेका उपनेता चेतनारायण आचार्यलाई खानेपानी, ग्रामीण तथा शहरी विकास मन्त्रालयको जिम्मेवारी तोकिएको छ ।
यस्तै, जनमत पार्टीका चन्द्रकेश गुप्ता सामाजिक विकासमन्त्री र राप्रपाका जानकीप्रसाद यादव उद्योग, पर्यटन तथा यातायात व्यवस्थामन्त्रीमा नियुक्त हुनुभएको छ । लुम्बिनी सरकारमा विश्वासको मत दिएका नागरिक उन्मुक्ति, जनता समाजवादी र लोकतान्त्रिक समाजवादी पार्टी भने सरकारमा सहभागी भएनन् ।
राप्रपाले कपिलवस्तुका जानकीप्रसाद यादवलाई उद्योग, पर्यटन तथा यातायात व्यवस्था मन्त्रालय जिम्मेवारीसहित सरकारमा पठाएको छ । जनमत पार्टीबाट रुपन्देहीबाट निर्वाचित दलका नेता चन्द्रकेश गुप्तालाई सामाजिक विकास मन्त्रालयको जिम्मेवारी दिइएको छ । मुख्यमन्त्रीलाई विश्वासको मत दिएको नागरिक उन्मुक्ति पार्टी र जनता समाजवादी पार्टी भने सरकारमा नजाने भएको छ ।
