अमरराज नहर्की
तनहुँ, माघ २९ गते । सचिन श्रेष्ठको स्मृतिमा दमौलीमा खुला दौड प्रतियोगिता आयोजना हुने भएको छ। रोट्याक्ट क्लब अफ दमौलीले २०औं स्वर्गीय सचिन श्रेष्ठको स्मृतिमा फागुन ७ गते दौड प्रतियोगिता गर्न लागेको हो ।
दमौलीको अनशन चौतारीबाट सुरु हुने दौड सफासडक, पृथ्वी राजमार्ग, गल्बुबेंसी, भादगाउँ हुँदै छाब्दीवाराही मन्दिरमा पुगेर सकिनेछ । नौ किमी दूरीको दौड प्रतियोगिताका पहिलो हुनेलाई २४ हजार, दोस्रोलाई १२ हजार र तेस्रो हुनेलाई १० हजार रुपियाँ पुरस्कार पाउने प्रतियोगिताका संयोजक उमेश पौडेलले जानकारी दिनुभयो ।
भारतको कोलकातामा रोट्याक्ट क्लबको कार्यक्रममा सहभागी हुन जाने क्रममा सवारी दुर्घटनामा परी ज्यान गुमाएका क्लबका तत्कालिक सहसचिव सचिनकुमार श्रेष्ठको स्मृतिमा क्लबले प्रतियोगिता गर्दै आएको छ ।
सचिनको स्मृतिमा सन् २००३ देखि हरेक वर्ष दौड प्रतियोगिता आयोजना हुँदै आएको क्लबका अध्यक्ष विशाल श्रेष्ठले जानकारी दिनुभयो ।
