काभ्रेपलाञ्चोक, माघ १७ गते । उपप्रधानमन्त्री एवम् अर्थमन्त्री विष्णु पौडेलले चालु आर्थिक वर्षमा राजस्व परिचालनमा धेरै पछाडि परिएको बताउनुभएको छ ।
काभ्रेपलान्चोकको धुलिखेलस्थित काठमाडौं विश्वविद्यालयमा नवनिर्मित बलराम–तारा प्रधान इनर्जी ल्याब भवनको आज (मङ्गलबार) उद्घाटन गर्दै गत आवको यही समयको राजस्व परिचालन दरको तुलनामा निकै पछाडि परिएको बताउनुभएको हो ।
“चालु आवमा राजस्व परिचालनमा हामी निकै पछाडि परेका छौँ, पुँजीगत खर्च जम्मा १४ देखि १५ प्रतिशतसम्म छ, यो गत आवको यहीँ समयको भन्दा निकै कम हो”, मन्त्री पौडेलले भन्नुभयो ।
यही अवस्थाबाट सुधार गर्ने अपेक्षा गर्दै उहाँले आउने वर्षको बजेट कसरी निर्माण गर्ने भन्ने चिन्ता रहेको बताउनुभयो । उहाँले समग्र अर्थ क्षेत्रमा चुनौती रहेको उल्लेख गर्नुभयो ।
उहाँले भन्नुभयो, “ब्याजदर, महँगी, विदेशी मुद्रास्फीति, ट्रेड ब्यालेन्सको प्रश्न हाम्रा सामुन्ने छ, आर्थिक दृष्टिकोणले केही चुनौती केही दबाबको सामना गर्दै आइरहनु परेको छ, यसलाई सकारात्मक बनाउन लागेका छौँ ।”
सरकार सामु आर्थिक क्षेत्र सकारात्मक बाउने चुनौती रहेकाले यसलाई सामना गर्दै गतिशील र विकसित आर्थिक अवस्था बनाउने अभियानमा सरोकारवालाले सहयोग गर्नुपर्ने उहाँको धारणा थियो ।
मन्त्री पौडेलले शिक्षाक्षेत्रको गुणस्तरीयतामा पनि चुनौती रहेकाले युवा जनशक्ति पलायन भएकोमा गुनासो गर्नुभयो । “गुणस्तरीय शिक्षाको खोजी नेपाली युवा संसारका विभिन्न मुलुक जान बाध्य छन्, जसबाट ठूलो रकम बिदेसिएको छ”, उहाँले भन्नुभयो, “यसले पैसा र युवा जनशक्ति दुवै पलायन भइरहेको छ ।”
उहाँले समग्र मुलुक परिवर्तन गर्ने शिक्षा व्यवस्थापन गर्ने सरकारको दायित्वभित्र पर्ने भएकाले यो चुनौतीलाई चिर्दै गुणस्तरीय सीपमूलक शिक्षा दिनु आवश्यक रहेको बताउनुभयो ।
उहाँले सो अवसरमा हाइड्रो इञ्जिनीयर स्व बलराम प्रधानले ऊर्जा क्षेत्रमा पुर्याउनुभएको योगदानको अनुशरण गर्न आग्रह गर्नुभयो । कार्यक्रममा विश्वविद्यालयका उपकुलपति प्रा. डा. भोला थापा, रजिष्टार डा. अच्युत वाग्ले, स्कुल अफ साइन्सका डीन मनिष पोखरेललगायतले विश्वविद्यालयमा कार्यरत प्राध्यापक स्व. प्रधानले ऊर्जा क्षेत्रमा पुर्याउनुभएको योगदानबारे चर्चा गर्नुभएको थियो ।
नेपालका पहिलो सङ्गठित ल्यावका रुपमा विश्वविद्यालयमा स्थापित उक्त दुई तले ग्रीन हाइड्रोजन ल्याव भवन कुल रू. दुई करोड ६८ लाख लागतमा निर्माण भएको हो । कुल लागतमध्ये रू. ४५ लाख स्व. प्रधानको परिवारले सहयोग गरेको हो ।
