राधा लुइटेल
फिदिम, मङ्सिर १८ गते । किरात समुदायको प्रमुख सांस्कृतिक पर्व उधौली आज देशभर, विशेषतः पूर्वी पहाडी भूभागमा, हर्षोल्लासपूर्वक मनाइँदै छ ।
किरात समुदायभित्रका लिम्बू, राई, सुनुवार र याख्खा जातिले मङ्सिर पूर्णिमाको दिनलाई चासोक तङनाम (न्वागी) का रूपमा सम्मानपूर्वक मनाउने चलन छ । लिम्बू समुदायमा नयाँ अन्न अर्पण गरी प्रकृतिप्रति कृतज्ञता व्यक्त गर्ने परम्परालाई चासोक तङनाम भनिन्छ ।
त्यसअनुरूप पाँचथर लगायत पूर्वका विभिन्न स्थानमा आज बिहानैदेखि मौलिक नृत्य, गीत–सङ्गीत तथा सांस्कृतिक कार्यक्रमको आयोजना गरिएको छ । प्रकृतिपूजकका रूपमा परिचित किरात समुदायले आजकै दिन नयाँ अन्न चढाइ न्वागी खानेरी पर्वको मूख्य विधि सम्पन्न गर्छन् ।
फिदिमस्थित सुम्हालुङ मन्दिर, सिलौती, लव्रेकुटी लगायतका पूजनीय स्थलमा बिहानदेखि भक्तजनको घुइँचो लागेको छ । सहभागीले विधिपूर्वक पूजा आराधना गर्दै समृद्धि, स्वास्थ्य र सामूहिक कल्याणको कामना गरेका छन् ।
यसैगरी, हिन्दू धर्मावलम्बीले पनि यो दिनलाई धान्य पूर्णिमाका रूपमा मनाउँदै गोठ पूजा गरेर मनाउदै छन् । किरात र हिन्दू दुबै समुदायका आफ्ना सांस्कृतिक मान्यता अनुसार मनाइने यो दिनले पूर्वी नेपालको बस्तीमा आस्था, उत्सव र सामूहिक उमङ्ग थपेको छ ।
