नवीन शिशिर विक
बागलुङ, माघ ४ गते । बागलुङ नगरपालिका– ८ सिगानामा टिपर दुर्घटना हुँदा चालकको घटनास्थलमै मृत्यु भएको छ । टिपर चालक मकवानपुरको हेटौँडा उपमहानगरपालिका –१४ का ४३ वर्षीय राजु मोक्तानको मृत्यु भएको जिल्ला प्रहरी कार्यालय बागलुङका प्रहरी नायब उपरीक्षक (डिएसपी) तथा सूचना अधिकारी गङ्गाबहादुर थापाले बताउनुभयो ।
बागलुङ नगरपालिका– ८ सिगानादेखि वडा – ३ काँठेखोला आउँदै गरेको बा २ क ९२५८ नम्बरको खाली टिपर आज बुधबार बिहान साढे ९ बजे अनियन्त्रित भई सिगानाको शेरामा सडकबाट अन्दाजी दुई सय मिटर तल खसेको थियो । बागलुङ–बरेङ सडकखण्ड निर्माणमा सञ्चालन भइरहेको टिपर सामग्री छाडेर फर्किँदै गर्दा दुर्घटना भएको थियो ।
