काठमाडौं, पुस १२ गते । साताको दोस्रो कारोबार दिन मङ्गलबार नेप्से परिसूचक उच्च अङ्कले वृद्धि भएको छ ।
आज उच्च रुपमा नेप्से बढेसँगै नेप्सेमा करिब पाँच महिना यताकै उच्च कारोबार भएको हो । नेप्से परिसूचक ५९.८७ अङ्क बढेर १९८३.९५ बिन्दुमा पुगेको छ ।
त्यस्तै, सेन्सेटिभ इण्डेक्स १०.६० अङ्क बढेको छ भने फ्लोट इण्डेक्स ३.६९ अङ्क र सेन्सेटिभ फ्लोट इण्डेक्स ३.२८ अङ्कले बढेको छ ।
कारोबारमा आएका २६१ कम्पनीको एक करोड २० लाख २९ हजार कित्ता शेयर तीन अर्ब ८८ करोड ४३ लाख ९६ हजार रुपियाँ बराबरको खरिदबिक्री भएको छ । सोमबार दुई अर्ब बराबरको कारोबार भएको थियो ।
आज १३ वटै उपसमूहको परिसूचक बढेको छ । जसमध्ये लगानी उपसमूहको परिसूचक ६.४३ प्रतिशतबढेको छ भने वित्त, होटल तथा पर्यटन र जलविद्युत् उपसमूहको परिसूचक ४ प्रतिशतभन्दा बढी बढेको छ ।
नेप्से बढेसँगै ६ वटा कम्पनीको शेयर सकारात्मक सर्किट लेभलमा कारोबार भएको छ । जसमा सिद्धार्थ इन्स्योरेन्स, मल्टीपर्पस फाइनान्स, अजोड इन्स्योरेन्स, सृजनशील लघुवित्त र कालिका पावरको शेयर सकारात्मक सर्किट लेभलमा कारोबार भएको हो ।
कारोबार रकमका आधारमा लक्ष्मी बैंक शीर्षस्थानमा छ । जसमा बैंकको २० करोड ९४ लाख रुपियाँ बराबरको शेयर खरिद बिक्री भएको छ ।
