मकवानपुर समाचारदाता
हेटौँडा, पुस १२ गते । केन्द्रमा सत्ता गठबन्धन टुटेसँगै बागमती प्रदेशको नयाँ सरकार निर्माणका लागि दलहरूको समीकरण फेरिने भएको छ ।
नेपाली कांग्रेस, नेकपा (माओवादी केन्द्र), नेकपा (एकीकृत समाजवादी)लगायतका केन्द्रमा रहेको लोकतान्त्रिक वाम गठबन्धन टुटेर नेकपा (एमाले), माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टीलगायतका दलहरूको नयाँ सत्ता समीकरण निर्माण भएसँगै बागमती प्रदेशमा सरकार निर्माणमा सत्ता समीकरण फेरिने भएको हो ।
लोकतान्त्रिक वाम गठबन्धनको प्रदेशमा कांग्रेस, माओवादी केन्द्र र एकीकृत समाजवादीबीच सरकार गठनका लागि तयारी चल्दै गर्दा नयाँ समीकरणअनुसार प्रदेशमा अब एमाले वा माओवादी केन्द्रको नेतृत्वमा गठबन्धनको सरकार बन्ने भएको छ । ११० प्रदेश सभा सदस्य रहेको बागमती प्रदेशमा सरकार गठनका लागि ५६ जना प्रदेश सभा सदस्य आवश्यक हुन्छ । सरकार गठनका लागि प्रदेश सभामा प्रतिनिधित्व गर्ने सात दल कुनैको पनि बहुमत नपुग्ने भएको यस प्रदेशमा सत्ता गठबन्धनको विकल्प छैन ।
केन्द्रमा गठबन्धन गरेका एमाले, माओवादी केन्द्र र राप्रपा मिल्दा सरकार गठनका लागि आवश्यक बहुमत पुग्ने देखिएको छ । यस प्रदेशमा दोस्रो ठूलो दलका रूपमा रहेको एमालेको २७, माओवादी केन्द्रको २१ र राप्रपाको १३ जना प्रदेश सभा सदस्य गरी ६१ प्रदेश सभा सदस्य पुग्ने छ तर राप्रपाले भने आफ्नो चुनावी एजेन्डामा प्रदेश खारेजीको माग गर्दै आएको छ । गत मङ्सिरमा सम्पन्न प्रतिनिधि सभा तथा प्रदेश सभा सदस्य निर्वाचनमा सहभागी राप्रपाको प्रमुख चुनावी मुद्दामध्ये प्रदेश संरचना खारेजी प्रमुख मुद्दा रहेको थियो ।
प्रदेश सभाको पहिलो कार्यकालमा बागमती प्रदेश सभामा राप्रपाबाट प्रतिनिधित्व गर्ने दुई जना प्रदेश सभा सदस्यले गत पाँच वर्षमा बसेको प्रदेश सभाको अधिकांश प्रदेश सभा बैठकमा प्रदेश संरचना देशका लागि बोझ भएको भन्दै विरोध गर्दै प्रदेश खारेजीको माग गरेका थिए ।
सङ्घीय सरकार निर्माणमा माओवादी केन्द्रको नेतृत्वलाई समर्थन जनाए पनि राप्रपाले सरकारमा नजाने निर्णय गरेको छ । राप्रपाका केन्द्रीय सदस्य एवं बागमती प्रदेशका प्रदेश सभा सदस्य लक्ष्मी घिमिरेले बागमती प्रदेशमा सरकार गठन गर्न समर्थन गर्ने वा नगर्ने र सरकारमा जाने वा नजाने भन्ने बारेमा निर्णय नभएको जानकारी दिनुभयो ।
उहाँले भन्नुभयो, “प्रदेश सरकारलाई समर्थन र सरकारमा सहभागिताका बारेमा पार्टी केन्द्रको बुधबार पुस १३ गते बस्ने बैठकले निर्णय गर्नेछ ।”
राप्रपाले प्रदेशमा सरकार गठनमा समर्थन नगरेको अवस्थामा एमालेको २७ र माओवादी केन्द्रको २१ गरी ४८ प्रदेश सभा सदस्य पुग्नेछ । जुन सरकार गठनका लागि बहुमत पुग्दैन । राप्रपाले समर्थन नगरेको अवस्थामा एमाले र माओवादीसहितको गठबन्धनलाई प्रदेश सरकार गठनका लागि सात जना प्रदेश सभा रहेको नेकपा (एकीकृत समाजवादी)सहित तीन जना प्रदेश सभा सदस्य रहेको नेपाल मजदुर किसान पार्टी वा दुई जना प्रदेश सभा सदस्य रहेको हाम्रो नेपाली पार्टीको सहयोग र समर्थन आवश्यक पर्ने हुन्छ ।
नेपाल मजदुर किसान पार्टीले सरकार निर्माणमा सहयोग, समर्थन र सरकारमा सहभागिता नजनाउने जनाएको छ । लोकतान्त्रिक वाम गठबन्धनले निरन्तरता पाउँदा कांग्रेसको ३७ जना, माओवादी केन्द्रको २१ जना र एकीकृत समाजवादीको सात जना प्रदेश सभा सदस्य गरी सरकार गठनका लागि आवश्यक बहुमत ६५ जना पुग्ने अवस्था रहेको थियो ।
