सिन्धुपाल्चोक समाचारदाता
सिन्धुपाल्चोक, पुस १२ गते । सिन्धुपाल्चोकको बाह्रबिसे नगरपालिका–८ का वडाध्यक्ष विमलप्रसाद पौड्यालले आफ्नो तलब भत्ताबापत पाउने रकमले वडाका विद्यालयलाई कम्प्युटर, प्रिन्टरलगायतका सूचना प्रविधिका सामग्री सहयोग गर्नुभएको छ । मासिक रूपमा निर्वाचित भएयता पाएको तलब भत्ता एक लाख ६० हजार रुपियाँमा अपुग रकम थपेर वडाध्यक्ष पौड्यालले एउटा माध्यमिक र तीन आधारभूत विद्यालयलाई प्रविधिमैत्री सामग्री खरिद गरी सहयोग गर्नुभएको हो । गत वैशाखमा भएको स्थानीय तह निर्वाचनमा मत माग्ने बेला आफूले तलब भत्ताले सहयोग गर्ने वाचा गरेका हुनाले वडाका विद्यालयलाई प्रविधिमैत्री बनाउन विद्यालयमा एउटा कम्प्युटर, प्रिन्टर र प्रोजेक्टर उपलब्ध गराइएको उहाँले बताउनुभयो ।
“मासिक रूपमा मैले पाउने २० हजार रुपियाँ हो, त्यही जम्मा पार्ने, अपुग रकममा थप गर्ने र बाँकी विद्यालयमा पनि कम्प्युटर दिने लक्ष्यमा छु,” पौड्यालले भन्नुभयो । बाह्रबिसे नगरपालिका–८ मा एउटा माध्यमिक र छवटा आधारभूत विद्यालय छन् । वडा कार्यालयमा तलब भत्ताकै रकमले एउटा सीसीटीभीसमेत किनिदिएको उहाँले जानकारी दिनुभयो ।
वडाको जम्बुस्थित सेतीदेवी पञ्चकन्या आधारभूत विद्यालय, सीताराम आधारभूत विद्यालय, महाकाली आधारभूत विद्यालय र भद्रकाली माध्यमिक विद्यालयलाई सामग्री वितरण गरिएको हो । बाह्रबिसे नगरको शिरघुडे लेक क्षेत्रमा रहेको सीताराम आधारभूत विद्यालयका प्रधानाध्यापक रामचन्द्र पौडेलले कम्प्युटरसहित अन्य सामग्रीले विद्यालयका बालबालिकाको पढाइमा सहजता ल्याउने बताउनुभयो । पौडेलले भन्नुभयो, “लेकमा कम्प्युटर नभएर समस्या थियो । अहिले वडाध्यक्षज्यूले किनिदिनु भएपछि धेरै सहज भएको छ, अहिले पाठ्यक्रमबाहेक वा इन्टरनेटको माध्यमबाट नयाँ कुरा पढाउन र अध्यापन गराउन धेरै सहज भएको छ ।”
त्यसैगरी बाह्रबिसे नगरपालिकाका प्रमुख बालकृष्ण बस्नेतले आफ्नो तलब भत्ताले गाउ“पालिकाभरका बेसहारा र पीडितलाई आवश्यक पर्ने खाद्यान्न, लत्ताकपडाजस्ता कुरामा खर्चने गर्नुभएको छ । ‘पीडितस“ग मेयर’ अभियान लिएर गाउ“टोल पुग्दै मासिक रूपमा तलब भत्ताबापत पाउने ३९ हजार रुपियाँसहित अन्य भत्ता रकमले नगरभरका अशक्त, पीडित र वृद्धवृद्धालाई उहाँले आवश्यक सामग्री सहयोग गर्ने गर्नुभएको छ । बाह्रबिसे नगर क्षेत्रमा रहेका विपन्न वर्गका पीडितको अवस्था अध्ययन गर्दा अनेकौँ अभाव भएको पाएपछि आफूले यस्तो अभियान चलाएको नगर प्रमुख बस्नेतले बताउनुभयो ।
गत मङ्गलबार स्थानीय कविता थामीको मृत्युुपछि थामीको परिवार र दुईमहिने शिशुलाई पौष्टिक आहारका लागि नगरपालिकाबाट दुई वर्षसम्म मासिक पाँच हजार रुपियाँ उपलब्ध गराउने व्यवस्था गरेको र आफ्नो यो महिनाको तलब भत्ताले सहयोग गरेर अन्य सहयोगको प्रतिबद्धता नगर प्रमुख बस्नेतले दिनुभएको छ ।
