हाम्रो देशको लालीगुँरास अन्त फुल्न दिनुहुन्न
फूलबारी यो बिगार्नेलाई बगैँचा डुल्न दिनुहुन्न ।
बुकी फुल्ने पाखैभरि, फाँटभरि काँस
आफैँ पौरख गरी बाँचौँ नगरौँ अर्काको आस
स्वाभिमानी भई बाँचौँ, हात थापी लिनुहुन्न
फूलबारी यो बिगार्नेलाई बगैँचा डुल्न दिनुहुन्न ।
उन्नति यो देशको खातिर जुट्नु पर्छ सब
कति हात बाँधी बस्ने ढिला भयो अब
जे–जे भयो भइहाल्यो अब बिग्रिनु हुन्न
फूलबारी यो बिगार्नेलाई बगैँचा डुल्न दिनुहुन्न ।
आफ्नै देश नरहेमा कहाँ जन्म्यौँ भन्ने हामी
धर्म सम्झी, कर्म गरी बनाउँ देशलाई नामी
आफ्नै नदी भई–भई अर्काको पानी पिउनु हुन्न
फूलबारी यो बिगार्नेलाई बगैँचा डुल्न दिनुहुन्न ।
