काठमाडौं, मंसिर १० गते । राष्ट्रिय च्याम्पियन प्रिन्स दाहाल र रशिला महर्जन प्रथम ललितपुर मेयर कप राष्ट्रिय ब्याडमिन्टन प्रतियोगिताको उपाधि जित्नुभएको छ ।
नेपाल ब्याडमिन्टन सङ्घले बरीयताको मान्यता प्रदान गरिएको प्रतियोगितामा नेपाल पुलिस क्लबबाट खेलेका प्रिन्सले सेनाका प्रफुल महर्जनलाई २१–९, २१–१४ ले र सेनाकी रशिलाले सेनाकै अनुमाया राईलाई १९–२१, २१–१५, २१–१८ ले हराउनुभयो । उपाधिसँगै दुवैले जनही ४० हजार रुपियाँ पुरस्कार पाउनुभयो । उपविजेता महर्जन र राईले २०/२० हजार रुपियाँ प्राप्त गर्नुभयो ।
प्रतियोगिताको पुरुष युगल उच्च २० वरीयता बाहेकको भिडन्तमा कास्कीका विधान अधिकारी र सेनाका पविन लिनथेपको जोडीले ललितपुरका दिपेश शाक्य र सुमन शाक्यको जोडीलाई २१–१२, २१–१८ को सोझो सेटमा हराउँदै उपाधि जित्नुभयो ।
पुरुष युगलतर्फ शीर्ष तीन स्थान प्राप्त गर्नेले क्रमशः ४० हजार, २० हजार र १० हजार रुपियाँ पुरस्कार पाए । विजेतालाई बागमती प्रदेश सभासद् रामकृष्ण चित्रकार, नेपाल ब्याडमिन्टन सङ्घका अध्यक्ष रामजीबहादुर श्रेष्ठ लगायतले पुरस्कार प्रदान गर्नुभयो ।
