रमेश विश्वकर्मा
गुल्मी, मङ्सिर ५ गते । आइतबार सम्पन्न प्रतिनिधि तथा प्रदेशसभा निर्वाचनको मतगणना गुल्मी क्षेत्र नम्बर २ मा सुरु भएको छ । जिल्लाको रेसुङ्गा बहुमुखी क्याम्पसमा रहेको मतगणना स्थलमा मतगणनाको कार्य सुरु गरिएको प्रमुख जिल्ला अधिकारी पुण्यविक्रम पौडेलले जानकारी दिनुभयो ।
अहिले प्रत्यक्षतर्फको मतगणना चलिरहेको छ । मतगणना स्थलमा सिसिटिभीसहित कडा सुरक्षा व्यवस्थासहित मतगणनाको कार्यलाई सुचारु गरिएको हो । मतगणना गर्ने प्रत्येक टोलीमा एक उम्मेदवारको तर्फबाट १ जनाका दरले मतगणना प्रतिनिधि राखिएको छ। एक लाख चार हजार ३२७ मतदाता रहेको यस क्षेत्रमा ५८ हजार ७७३ मत खसेको थियो ।
यस क्षेत्रमा गठबन्धनको तर्फबाट नेकपा (एकीकृत समाजवादी) का केन्द्रीय सचिव रामकुमारी झाँक्री र नेकपा (एमाले) का केन्द्रीय सचिव गोकर्णराज विष्टबीच मुख्य प्रतिस्पर्धा हुने अनुमान गरिएको छ ।
आइतबार भएको निर्वाचनमा जिल्लामा ५७.०४ प्रतिशत मत खसेको थियो । जिल्ला निर्वाचन कार्यालय गुल्मीको प्रारम्भिक विवरण अनुसार यस जिल्लामा १ लाख २७ हजार ५४० मत खसेको हो । जिल्लामा कुल २ लाख २३ हजार ६१५ मतदाता रहेका छन्।
